كل الصيدليات قافله النهارده
و معلقين ورقة كاتبين عليها الكلام ده
القصة كلها إن فى 2005 كان فيه اتفاقية محاسبة ضريبية بين الضرايب و الصيادلة وكان نظامه إن الضرايب بتحاسب الصيادلة من المنبع بمعنى إنه بيحاسب الصيدلى على أساس فواتير شرائه للأدوية ...
لحد ما يوم 9/2/2009 طلعت الضرايب قرار تانى بعد ما اكتشفت فجاة إن الوضع الحالى وحش و مش جميل وقررت إنها هتلزم الصيدلى بإنه يبقى معاه وثائق توضح المبالغ إللى اشترى بيها وإللى باع بيها ... يمكن ده هيخلى كل صيدلية تعين محاسب عندها بس مش دى المشكلة
المشكلة إن الضرايب عايزه تطبق القانون بأثر رجعى .. يعنى من 2005 ، يعنى بتطالب الصيادلة إن يبقى عندهم ما يثبت إللى اتدفع و إللى اتكسب فى الـ 3 سنين إللى فاتت
ولإن محدش من الصيادلة هيقدر يوفر الحاجات دى - لإن ببساطه الضرايب نفسها مكانتش بتطالبهم بكده - فكتير منهم هيبقى من وجهة نظر الضرايب ( متهرب ) و طبعا ما يتبع كده من حبس وخلافه ....
يمكن على الرغم من إنى محتاج أجيب دوا النهارده .... إلا إنى بجد مبسوط بيهم
لإنهم إيجابيين
لإن فكر إنك تعترض بقى موجود
فكر إنك تطالب بحقك
فكر غير إللى اتربينا عليه
بس هل الإضراب و الاعتصام حلو ولا وحش؟
يعنى زى ما بقول أهه أنا محتاج دوا و مش عارف أجيب .. و يمكن أنا أفضل حالا من ناس كتير يمكن محتاجه الدوا أكتر منى
النهارده مثلا فى يوم واحد فيه اضراب للصيادلة و اضراب لسواقين مقطورات النقل الثقيل لإن صدر قانون بمنعها سنة 2011
طيب هل الإضرابات و الإعتصامات بتجيب من النتايج الإيجابية ما يعادل سلبياتها ؟
هل يا ترى ممكن فى يوم يحصل إضراب فى المستشفيات ؟
هل هو تغيير فكر فعلا ولا مجرد حدث عابر ؟
لو فيه حاجه مهمه زى دى و انت ممكن تتأثر بيها ، ممكن عشان تعدلها تشارك فى إضراب زى ده ولا هتخاف ؟
ولا هتبقى شايف إنه مش هيجيب نتيجه ؟
هناك 4 تعليقات:
اولا :شكرا على توضيحك لوجهة نظر الصيادلة واضرابهم نتيجة لإيه لأن في ناس كتير متعرفش وانا كنت منهم
ثانيا : بجد مدونتك جميلة وبتناقش قضايا كبيرة بأسلوب بسيط
شكرا جدا على ردك
وأنا سعيد جدا إن المدونه عجبتك
طبعاً أنا مع الإضراب بشدة
ده أنا شخصياً أضربت بصفتى صيدلى يعنى
وكتبت عن الموضوع فى مدنتى
شكراً على التعليق على القضية دى
شكرا لزيارتك يا دكتور ياسر
و أتمنى يكون الموضوع عجبك
إرسال تعليق