الجمعة، 21 يونيو 2019

اعرف أكتر عن زيمبابوى

السلام عليكم ..

ماتش الافتتاح فى بطولة إفريقيا 2019 فى مصر بين "مصر وزيمبابوى"  يوم 21/6

الفيديو ده فيه معلومات عامة عن دولة زيمبابوى  وعن فريق الكورة المشارك فى البطولة




الثلاثاء، 5 مارس 2019

واحة خطاب ( تقييم)


سمعت عن واحة خطاب كتير قبل ما أروحها .. من ناس كتير أكلوا هناك ومنبهرين بالمكان وبجودة  الأكل ..

ده غير الدعاية الكبيره و ظهورهم فى برامج مع عمرو اديب والأكيل وغيره ،،


 



حتى محمد صلاح أما نزل اجازه  راح اكل هناك ..



عقدنا العزم وتوكلت على الله مع زملاء العمل .. و طلعنا على واحة خطاب. .

كان وقت ماتش ليفربول و مانسستر يونايتد .. اخترنا مكان فيه تليفزيون علشان الماتش .. وده خلانا اخترنا مكان مش الافضل .. بس اغلب اللى كانوا قاعدين كانوا فى نفس المكان غالبا لنفس السبب ..




كنا تلاته .. طلبنا :
- مكرونه مبكبكه مع نص نيفه ضانى
- وز بسمتى ومندى ضانى
- تلت مشاوى





التعامل هناك كويس جدا من الكل وفيه احترافيه ف الشغل .. وواضح إن الناس حابه المكان اللى شغاله فيه 


خلينا نتفق على طريقة تقييم 

9-10  رائع - لازم تروح المكان ده

7-8  ممتاز - كويس جدا

5-6  متوسط .. يعنى لو انت عملت مطعم الصبح غالبا هيبقى كده .. ممكن تروح خاصة لو معزوم  :)

3-4  سئ .. اقل من المتوسط 

0-2  اوعى تروح هناك ..



الاكل ..

المكرونه المبكبكه:  اقل من التوقعات .. عاديه جدا .. تقترب من اى  مكرونه ممكن الحاجه تعملها فى البينت
٦/١٠

النيفه الضانى:  الطعم كويس ، السوى كويس .. 
٧/١٠

الطبق ده دسم فعلا يقفل ..







الطبق التانى ..

الرز البسمتى:   طعم كويس .. و إن كان مش فارق كتير عن الرز البسمتى ف اى مكان تانى
٧/١٠

المندى الضانى:  الطعم كويس 
٧/١٠

الطبق ده افضل من اللى قبله .. لو هتطلب واحد فيهم ارشحلك ده ..







المشويات
٦/١٠
عادية .. يمكن اقل من اى محل مشويات متخصص






التحلية:
كنافة بالقشطه و كنافة بالجبنة
 دى كانت صاحبة الـ master scene .. كانت أفضل حاجه فى الأكل .. بس تقيله جداااا
8/10





هناك قابلنا كابتن وليد صلاح الدين .. طبعا حاول جاهدا يتصور معاناةبس احنا كنا حازمين فى مبدأ no media.



التقييم الشخصى :


1- النظافه والشكل العام
8/10
2- السرعة
7/10
3- الأكل
المكرونه 6/10
النيفه الضانى 7/10
الأرز البسمتى 7/10
المندى الضانى 7/10

المشويات 6/10
الكنافه 8/10
14/20
4- الخدمه والتعامل 9/10
التقييم النهائى 8/10 (ممتاز)


اجمالا .. هى خروجه وقعده كويسه .. بس المستوى وإن كان كويس  إلا إنه الاقل أقل بكتير من المتوقع بالنسبه لمكان بالاسم ده وعليه كل هذا الزخم وكل الحكايات الأسطورية عن الأكل وجودته .. 










مصادر خارجية
On Ent https://www.youtube.com/watch?v=l4t-T8D1GC8&t=7s
cbc Sofra https://www.youtube.com/watch?v=nluvZye8JAA
FB official page  https://www.facebook.com/wahettkhattab/photos/pcb.1886194888136933/1886194851470270/?type=3&theater
Manchester United https://www.youtube.com/watch?v=jCS02k86lSg
Elwatan newspaper  https://www.elwatannews.com/news/details/3425182










الأربعاء، 20 فبراير 2019

المحلة و مطعم اسماك الحوت .. تقييم

ليلة  راس  السنه كنا ف المحلة بنكشف ..

حسب مااذكر دى تالت زيارة ليا للمحلة .. 

اول زيارة كنت بخير ماتش الزمالك و غزل المحلة ف ستاد الغزل .. ويومها الزمالك فاز ١-٠  




تلا الزيارة دى زيارتين لاغراض طبية .. اخرها الزيارا دى ؛؛

المحلة من المدن عجيبة التخطيط .. ضيقة الشوارع مكسرتها .. حتى الان لم أر مثل المحلة ودمنهور ف عجيب تخطيطهم  .. لكن فى هذا الصدد للمحلة شأن آخر ..



اما قلنا  ناكل واحنا هناك كلمنا الزملاء وحوش المحلة .. ايه نروح فين ؟

اقتراح السمك الوحيد .. كان اسمالك الحوت .. سور نادى البلدية ..

توكلنا على الله و عقدها العزم على الحوت ؛؛

خلينا نتفق على طريقة تقييم 

9-10  رائع - لازم تروح المكان ده

7-8  ممتاز - كويس جدا

5-6  متوسط .. يعنى لو انت عملت مطعم الصبح غالبا هيبقى كده .. ممكن تروح خاصة لو معزوم  :)

3-4  سئ .. اقل من المتوسط 

0-2  اوعى تروح هناك ..



المطعم كان فاضى مكنش فيه غيرنا
الأكل أخد وقت طويل على ما جه
شوربة السى فود مستواها متوسط أو أقل
الأرز .. كويس
السمك ( مشوى - سنجارى ) متوسط .
الجمبرى .. طلبنا جمبرى شيش .. يمكن كان أفضل حاجه ..
1- النظافه والشكل العام
4/10
2- السرعة
4/10
3- الأكل
الشوربه 5/10
الأرز 5/10
السمك السنجارى 5/10
السمك المشوى 5/10
الجمبرى 7/10
11/20
4- الخدمه والتعامل 5/10
التقييم النهائى 5/10 (متوسط)







الجمعة، 20 نوفمبر 2015

تصنيف الفيفا

السلام عليكم

المفترض ان قرعة تصفيات كاس العالم الخاصة بافريقيا هتبقى فى يونيو القادم

وهيبقى تصنيف الفرق فيها قائم على اساس ترتيب الدول الشهرى اللى بيصدر من الاتحاد الدولى ..



الترتيب ده بيتحسب على اساس نتائج الفريق فى آخر 4 سنين مع الوضع فى الاعتبار قوة الفريق المنافس و هل المباراة رسمية او ودية .. يعنى اما فريق يفوز على الارجنتين فى كاس العالم بياخد نقط فى الترتيب اكتر من فريق فاز على بوروندى وديا فى نفس اليوم ،،

نظام التصفيات هيبقى كالآتى :
20 دولة متقسمين على 5 محموعات هيتأهل الأول مباشرة لكاس العالم .. يعنى كل مجموعه 4 فرق ،
وبالتالى ال 20 دولة متقسمين لاربع تصنيفات "أول - تانى -تالت- رابع " وكل مجموعه بتضم دولة من كل تصنيف

الدول ال 20 اللى وصلت المرحلة النهائية من التصفيات هى :
مصر - كوت دى فوار - الكاميرون - أوغندا - بوركينا - الجزائر - الكونغو - زامبيا - ليبيا - غانا - تونس -نيجيريا - جنوب افريقيا - المغرب - الجابون - مالى - جمهورية الكونغو - غينيا - الرأس الاخضر - السنغال

ووفقا لترتيب الفيف الحالى .. فالدول موزعة فى التصنيف كالآتى :
تصنيف أول : كوت دى فوار – الجزائر – غانا – الرأس الأخضر - السنغال
تصنيف تانى: تونس - الكاميرون – الكونغو – غينيا – الكونغو الديمقراطية
تصنيف تالت: مصر - نيجيريا- مالى - أوغندا – زامبيا
تصنيف رابع: الجابون - جنوب افريقيا - المغرب - بوركينا – ليبيا

وبالتالى فان التصنيف لو فضل كده لغاية القرعه فى يونيو فمصر هتبقى مع فريق من التصنيف الاول وفريق من التصنيف التانى وفريق من التصنيف الرابع

يعنى ممكن تبقى مجموعة مصر كده
كوت دى فوار - الكاميرون - مصر - المغرب

المجموعه الاسهل لو فضل التصنيف كده ممكن تبقى
الرأس الأخضر - الكونغو الديمقراطية - مصر - ليبيا
ودى تبقى فرصة الرأس الأخضر للتأهل لكاس العالم :)

ا
لحل فى لعب مباريات كتير مع فرق قوية والفوز عليها من اجل تحسين ترتيب الفريق فى تصنيف الفيفا والانتقال للتصنيف التانى على الاقل .. خاصة ان مصر حاليا اول التصنيف التالت

الاثنين، 7 أبريل 2014

شفوى الجراحة #امتحانات

السلام عليكم ..

بما انى لسه فاكر ..

ويما ان النور مش قاطع

 وبما ان الفاضى يعمل قاضى ..
وبما انى معاييش واسطه عشان ابقى قاضى .. 
يبقى اهو اقعد اكتب  ذكريات امتحانات الشفوى،،


الشفوى فى تعريفه : "هو حاجه معموله عشان تدى ناس معينه درجات وعشان تمتحن ناس تانيه وعشان ناس تالته تطلع عقدها على الناس التانيه السابق ذكرهم .."

الجراحة ..

الجراحه من احسن المواد اللى حليت فيها فى النظرى .. سواء فى اعمال السنه او امتحان آخر السنه .. يمكن باستثناء سؤال كان عليه ربع درجة الورقة الأولى ف آخر السنه .. وقت ما قرر احد الاساتذه انه يعلم ع الدفعه بالكامل عشان الطالبه مكانوش حاضرين محاضرته بالعدد الذى يليق به ،،



الجميل ان قبل الامتحان النظرى جه الدكتور اللى هيحط الامتحان وعمل اجتماع مع الدفعه وقال فيه على نظام الامتحان وتوزيعة الدرجات .. عشان تروح الامتحان وتلاقى طبعا حاجه تانيه غير اللى اتقالت .. بس الحق يقال كان الامتحان كله ماشى زى ما الدكتور قال فى نظامه وتوزيعة درجاته عدا السؤال بتاع الدكتور التانى ده ..



المهم ان اجابة هذا السؤال اللى عليه ربع درجة الامتحان كانت نص صفحه فى اى كتاب جراحة يحترم نفسه .. لكن طبعا الربع صفحه دى لم تكن كافيه للاجابة عن سؤال يحتل هذه القيمه والقامه التى يحسدها عليه باقى زملاؤه الاسئلة 

واحد من الزملا الدحيحه بعد الامتحان بقولوا عملت ايه يابنى ف السؤال ده ؟ قالى عادى .. قلت البتاعه دى بتعمل التهاب ف البنكرياس .. وكملت السؤال عن التهاب النبكرياس ..



آه صحيح .. الشفوى

الجراحه عليها 900 درجه .. منهم 432 درجه يعنى نص الماده تقريبا على 4 لجان .. اللجنة فيهم بـ 108 درجه على يومين
 يعنى نص الماده تقريبا مع 4 دكاتره بس ،،

اول يوم لجنتين حالات كلينيكال
تانى يوم لجنة تشريح وآلات ولجنة آشعة وباثولوجى


الليله اللى قبل امتحان الكلينيكال معرفتش انام نهائيا .. وفضلت مطبق لغاية اما رحت الكلية تانى يوم الصبح .. طبعا اول ما وصلت الكلية بقيت عايز انام ..

اول ما دخلت القسم لقيت نايب مقابلنى بسله فيها ورق وقالى اسحب ورقه ..

 قلت يمكن اكسب عجله ولا خلاط ولا حاجه ..   


 سحبت الورقه واديتهاله .. اول ما بص فيها بصلى بصة شفقه كده وقام كاتب اسمى ف اللجنتين اللى طلع رقمهم ف الورقة ..



دخلت ع اول حالة .. خير يا ست .. عندى كيس دهنى"ليبوما" ..

اسهل حاله ف حالات كلينيكال الجراحه .. قلت بس .. فل اوى ..
الاجمل انى وانا مسافر ف الطريق لسه قارى هذا الموضوع تحديدا ف العربيه .. 


المفروض بتشوف حالتين الكلينيكال وتكتب شيتاتهم وبعد كده تقعد تستنى اما الممتحن يندهلك تروحله عند الحاله 


كتبت الشيت وظبطه ورحت للحاله التانيه .. التى اتضح انقفا اها حالة عظام ..

طبعا معلومات اى طالب سنه سادسه يحترم نفسه فى كلينيكال جراحة العظام شبه معلومات اى فرخه عن اللغة الصينية .. العظم زيه زى اى سبيشيال سواء ف الباطنه او الجراحه بتعرف النظرى بتاعه كويس اما الكلينيكال فمتعرفش عنه حاجه ..


كنا تقريبا 3 بس ف هذا اليوم اللى اخدنا حالة جراحة خاصة وهى حالة العظم دى .. وكان كل اما حد يسال فى فترة الانتظار قبل ما تقابل الممتحن ويعرف انك معاك حالة عظم يبصلك بصة ابويه حانيه ويطبب عليك وممكن يكرمشلك 5 جنيه  ولا حاجه ..



واقفا امام الحالة براجع الكلمتين النظرى اللى اعرفهم ف العضم وبحاول استخرج كل ما يصلح كلينيكال منهم  .. أذ فجأة جه احد الاشخاص وقالى اهم حاجه تسال عن كذا وكذا وتعمل كذا وكذا ومشى ..


كتبت الشيت مستعينا بالكلمتين اللى الراجل قالهم .. خرجت بفكر ان مش مشكله اللى يضيع ف لجنة العضم يتعوض ف لجنة الليبوما .. دى ليبوما .




دخلت امتحن على اول حالة .. حالة الكيس الدهنى .. اقرا يابنى الشيت ..

بس ..

بدأت اقرا الشيت ولسه ف الاول  .. وعمك ده مش عاجبه حاجه 

. ياعم احنا لسه ف الشيت .. احنا عملنا حاجه 

المهم حتى لا نطيل  .. خلاصة الموضوع ان "ايه ده ؟ اللى اللى بتقوله ده ؟ شوفلى الـ edge كده .. اييييييه داااا؟ احنا علمناكوا كده؟ "

المهم .. خلصت اللجنة على أسوأ ما يكون .. ودى حالة الليبوما ..


بس ... اذا كانت اسهل حاله ف الجراحه كده .. ما بالك بحالة العضم ..



دخلت لجنة العضم وانا خلاص بقى .. مش نايم بقالى حبه حلوين يعنى .. لسه متبهدل ف اللجنه اللى قبلها ..ولسان حالى انجز يا عم بقى وخلينا نروح


اذ أوفاجأ .. براجل سكره .. آى والله .. 

اقرا يا بنى الشيت .. 
كام سؤال نظرى ..
تعرف تعمل الـ test الفلانى ؟ ورينى كده ؟ طب اسكت بقى عشان منقصكش 

يقال انه ادانى 108 من 108



تانى يوم امتحان كان لجنة تشريح وآلات حيث بتمتحن ف المشرحه على جثة فى منهج تشريح سنه اوى وتانيه مجتمعين ف لجنة واحده فى سنه سادسه  :)   ..

أما تانى لجنة فدى لجنة آشعة وباثولوجى



دخلت اللجنة الأولانية .. 

اتفضل .. اتفضلت 

ايه دى ؟ 
كانت آلة بيستخدموها ف المسالك عشان يمسكوا بيها الحالب 
وده اللى قلته مع اسمها اللى كنت فاكره وقتها يعنى :) ..

اممم ..

- وهم صنعوها بالشكل ده ليه ؟
نعم ..
- صنعوها بالشكل ده ليه ؟

يعنى يمكن بتفكر اللى اخترعها بحادثه حصلتله وهو صغير ولا حاجه .. بس يعنى محبتش اشارك هواجسى مع الدكتور .. قلتله يمكن عشان تبقى blunt  ويعرفوا يمسكوا بيها الانسجه السوفت ولابلابلابلا

بصة قرف مصحوبه بـ ..امممممم


انا مالى انا صنعوها بالشكل ده ليه .. دى حاجه يسأل فيها الساده العلماء يا بيه


احد الزملا الـ recommended  اتسأل سؤال مشابه فى لجنة أخرى عن آلة  أخرى مصنوعه من ايه ؟ قاله ستينلس ستيل 
- ليه ؟
= معرفش
- طيب آآ..
= طبعا هتقولى صنعوها فين وسنة كام .. هقلك برضه معرفش..
-هيهيهيهيى
= هيهيهيهيى

ودى مثال يوضح االفرق بين ابناء الـ recommended وابناء اللى مش recommended

واخدلى بالك انت يا سامى :) ..


المهم .. بعد ما اكتفى من اسئلة الآلات .. قمنا عند الجثة .. حيث هنتكلم بقى عن الكبد او القلب او الـ الاعصاب اللى بتغذى عضلة اللسان ؟

نعم ..
- قولى الـ nerve supply بتاع الـ tongue

خلاصة اللجنة كانت الـ اممممم .. ونظرة القرف




دخلت لجنة الاشعة والباثولوجى .. لقيت دكتور كبير ف السن قاعد .. 

طلع فيلم آشعه .. ايه ده ؟ قلتله
طلع فيلم تانى .. ايه ده ؟ قلتله
سالنى ف الجار اللى قدامه جاوبت

بصراحه ابليت بلاء حسنا فى هذه اللجنة

والراجل كان مبسوط الحقيقه .. وانت شاطر وكويس .. انت احسن واحد امتحن عندى النهارده ..

بعد ما طلعت سمعت اشاعات عن ان هذا الرجل ربما ينتمى لفصيلة الدكاتره اللى شايفه ان الطالب ليه سقف درجات ميعديهوش

"الواد ده ممتاز .. لا حقيقى ممتاز .. كده اقدر اديله 70 من 108 وانا ضميرى مستريح "


 فيه دكاتره فعلا شايفه ان الطالب ميعديش حد معين .. وفيه ناس تانيه بتدى صفر صريح كدهه حتى مش 5 مثلا لزوم البدله والسفر وخلافه ..


تمت ..

الجمعة، 13 ديسمبر 2013

انتخابات نقابة الأطباء

السلام عليكم
الجمعه 13-12-2013

المشاركة الأولى فى انتخابات نقابة الأطباء....


رحت أنا والصديق أيمن تاج للنقابه وأدلينا بأصواتنا ... بس كده :)


ملاحظات ..

- النهارده كان برد فزيييييييع

- أيمن ده كويس 

- كان فيه رجال شرطه يؤمنون سير العملية الانتخابية ...

- الراجل اللى كان ف اللجنة بيطلع الأسامى طلع قريبى ..

- كان فيه دعايه انتخابية جوه النقابه عادى جدا ...

- لسه معرفش النتيجه بالتفصيل ..



وده أيمن وهو واقف مستنينى ...