الخميس، 29 أكتوبر 2009

صور

- يااااه .. إنت الصور دى لسه عندك
= آه ..فاكر الرحلة دى .. إحنا كنا فى سنه كام وقتها؟
- مش فاكر والله .. شوف أنا أهو .. بس إنت فين ؟ مش باين يعنى ؟
= أنا إللى كنت بصور يا ناصح .. ده الفيلم بتاعى و من الكاميرا بتاعتى
- كانت فين الصوره دى؟
= الصورة دى كانت أما نزلنا فى الريست هاوس
- شايف الواد خالد عامل إزاى .... عبيط من يومه
= أيوه .. بس عبيط بعربية دايو ياخويا
- دايو ؟؟ ليه ؟
= جابها بالتقسيط من مرتبه بتاع شركة الأدوية
- يا حلاوه
= دا غير العيادة إللى أبوه فتحهاله فى بلدهم أول ما خلص بيطرى على طول
- وعلى أهه .. فاكر كان عمل إيه فى الرحلة دى ؟
= لأ .. كان عمل إيه ؟؟
- مش فاكر يابنى .. كان وقع الشى على رجل المشرف الأستاذ حسين
= لا بصراحه مش فاكر
- مانا طول عمرى بقلك ذاكرتك ضعيفه
= إنت إللى ذاكرتك قوية زيادة عن اللزوم
- ودا الواد أحمد علاء ... فتح صيدلية وشغال زى الفل دلوقتى
= مع إن الواد طول عمره مشاغب .. ومكنش حد يصدق إنه هيفلح فى الدراسه
- ودا .... هشام ... هو كان دخل كلية إيه ؟
= مش عارف والله ... إنت عارف أنا كنت بسترخمه أصلا
- إشرب شايك بس زمانه برد
= وشريف أهه ... باين نصه بس
- آه بالمناسبه كنت عنده إمبارح فى مكتب المحاسبه بتاعه و بيسلم عليك
= كنت عنده بتعمل إيه ياخويا ؟
- يعنى ساعات كده بفوت عليه أقعد معاه شويه
= و إيه الصوره دى ؟؟ مصور باسم لوحده ليه ؟
- هتلاقينى كنت عايز أحرق الفيلم ولا حاجه
= ههههههههه ... وهو لسه برضه بيطلع بعربية الأتارى؟
- آه ياخويا ماشى يخبط فى الخلق أهه ... هو شايل كام نجمه دلوقتى ؟
= معرفش .. عامة خد بالك من نفسك بقى
- على فكره خطوبته بعد إسبوع
= خطوبه ؟! .... أنا سمعت الإسم دا قبل كده
- هههههه .. ياعم خليك متفائل .. مش كده .. كلها كام سنه ونخطب ... قوم بينا نكمل مذاكرة الجراحه الإمتحان قرب

الاثنين، 12 أكتوبر 2009

يا ترى 2 ولا 3 ؟؟

السلام عليكم ....

طول منا ماشى فى الشارع امبارح بعد ماتش الجزاير ورواندا سامع الناس معديه تتكلم عن الماتش وعن ماتشنا اللى جى مع الجزاير واللى يقلك 2 نتأهل واللى يقول لا 3 ...


الكوره بتثبت فعلا انها تقريبا الحاجه الوحيده اللى رابطه الناس بالبلد دى ...

الشباب الناقم على البلد وعلى أحوالها وبيشتم فيها .. هو نفسه اللى بيقعد يهتفلها ويشجعها أما بتلعب كوره

طبعا المشكلة مش فى البلد .. المشكلة فى اللى فيها .. بس ده مش موضوعنا دلوقتى


بس أما تبقى آمال أمة بحالها متعلقه بماتش كوره .. يبقى ده أكيد مش صح ..

كنا بنتكلم مع سواق تاكسى امبارح وجت سيرة الجرايد فقال انه معندوش وقت للكلام الفاضى ده

احنا بنتكلم عن ناس قراية الجرايد بالنسبه لها رفاهية .. ده بيروح البيت ساعة عايز يشوف الماتش ويتبسط أو يتفرج على أى قناة فيها اسفاف وخلاص وينزل الشغل تانى

بس هل هو غلطان فى كده؟؟

احنا شعب مجنى علينا ..بس بايدينا ....

مش غلط اننا نشجع كوره .. أنا شخصيا أما رواندا جابت الجون امبارح أقعدت أزعق بقى وجووون .. لحد ما الوالده صحيت من النوم مخضوضه
" فيه ايه ؟ "
= رواندا جابت جون

كان واضح طبعا انها اقتنعت بالمبرر بتاعى يعنى ...



مش غلط اننا نشجع كوره .. انما الغلط انها تبقى مبلغ طموحاتنا وآمالنا ...




الملاحظ كمان ان فيه شحن كبير ..









تشوف (قلة الأدب ) و الاستفزاز والكلام الفاضى

* " فلوس الفراعنة لشراء الحكم و الفريق الرواندي "

* " الآن سنزور مصر لمشاهدة الأهرامات فقط! "

* " معركة مصر "

* مصر غلبت زامبيا عشان راشيين الحكم

* رواندا لعبت حلو مش عشان تتأهل لبطولة افريقيا ، انما عشان مصر دافعالها ودافعه للحكم



معتقدش ان لوكانت مصر او الجزاير هيلاعبوا اسرائيل مثلا كان هيبقى الوضع كده

كده أصلا الأمور بتخرج بره حدود كونها مجرد كوره



وكان طبيعى ان يبقى الشحن من الناحيتين ..


عمرو أديب فى بداية حلقة القاهرة اليوم



هو ده حقيقى فعلا .... اننا اللى علمناهم العربى وحقيقى فعلا اننا دربناهم و ساعدناهم ، ده يا أخى حجة فرنسا فى حربنا فى العدوان الثلاثى كانت مساعدتنا للثورة الجزائرية

حماده بيقولى ان الجزاير هى الدوله الوحيدة اللى كانت مُحتله وفى نفس الوقت عندها سلاح جوى فى دوله تانيه .. لان ببساطه مصر اشترتلهم طيارات وجابت الطيارين ودربتهم هنا

بس على الرغم من ان الكلام ده صح .. الا أن مش كل حاجه صح ينفع تتقال فى التلفزيون ... بس أنا شايف - من وجهة نظرى - ان ده يمكن سر نجاح عمرو أيب .. لإنه قعلا بيقول اللى انت نفسك تقوله ،،، غير كتير من المذيعين المتصنعين اللى بتحس انه موظف جى يخلص الحلقة ويمضى ويروح ...


مبروك للجزائر ..

فريق الجزاير الضعيف .. اللى كان عمره ما هيتأهل لولا وجوده فى مجموعة واحدة مع مصر ...




" السلام عليكم... { ويمكرون ويمكر الله والله خير الماكرين } أتمنى أن تقوم أجهزة إستخباراتنا بالكشف عن خبايا الصفقة التي تمت بين مصر وزامبيا ورواندا وهل لمبارك يد في ذلك فالرجل لا يريد أن ينغص شيئ على مشروعه الرامي إلى توريث الحكم لولي عهده الأمير جمال ويريد أن يبقى أشقاؤنا المصريين مخدرين بحلم المونديال حتى يستفيقوا على عهد الرئيس جمال مبارك. والله مهزلة "

تعليق لأحد الزوار فى موقع لجريدة جزائرية




الجمعة، 9 أكتوبر 2009

زامبيا

زامبيا


بطاقة شخصية :

السكان :11,696,000مليون تسمة

المساحة :752,614 km²

العاصمة : لوساكا

اللغة الرسمية : الانجليزية

العملة : كواشا

الديانة الرسمية : المسيحية

يشكل المسلمون 5 % من السكان



علم زامبيا



الاسم القديم : روديسيا الشمالية ( بينما روديسيا الجنوبية هى زيمبابوى حاليا )

جاء اسم زامبيا من نهر ( زمبيزى ) الذى يشكل أغلب حدودها الجنوبية


نهر زمبيزى


هو رابع أنهار افريقيا من حيث الطول (2750 كم) ويكون نهر الزمبيزى شلالات فيكتوريا





نظامها ايه زامبيا دى يعنى ؟؟

زامبيا نظام الحكم بها جمهورى

زامبيا دولة حبيسه


الاحصائيات بتقول ان 1 من كل 5 من البالغين مصاب بالإيدز ( أكتر من 10 % من السكان )


زامبيا أولى دول العالم تصديرا للنحاس ، وده واحد من أهم مصادر دخلها القومى


منتخب زامبيا :

أهم انجازات الفريق

احتلال المركز الثالث في كاس الامم الافريقية سنة 1996 بعد الفوز على غانا ب1/0 ، وفى البطوله دى كسبوا مصر فى دور الـ 8 3-1

خسارة مباراة نهائي كاس الامم الافريقية 1994 امام نيجيريا

احتلال المركز الثالث سنة 1990

احتلال المركز الثالث سنة 1982

وصيف منتخب جمهورية الكونغو سنة 1974



صور من زامبيا :


شلالات فيكتوريا






شلالات كالامبو :D


بحيرة كاريبا


الطبيعة الزامبية



لوساكا- العاصمة - ( العاصمة هى العاصمة فى أى مكان .. حيث تجد الخدمات والأحياء الراقية والشوارع النظيفة والسينما والمحسرح ومولات التسوق والفنادق )







صور من الريف الزامبى

الأربعاء، 7 أكتوبر 2009

7 أكتوبر ... العيد القومى للغربية

السلام عليكم

7 أكتوبر .. العيد القومى لمحافظة الغربية

محافظة الغربية مساحتها 1948 كم مربع و عدد سكانها 3 مليون و 400 ألف نسمه

محافظة الغربية بتتكون من 8 مراكز ( طنطا - المحلة الكبرى - زفتي - كفر الزيات - السنطة - سمنود - قطور - بسيون )




شعار المحافظة

عبارة عن ترس ذهبى بداخله مئذنة وقبة المسجد الأحمدى





اختير يوم 7 أكتوبر العيد القومى للغربية فى ذكرى صمود شعب الغربية ومقاومته للحملة الفرنسية عام 1798


كان لى أن أحضر احتفالات العيد القومى فى طنطا بحكم الدراسه ... حيث البهجه والأعلام الملونه والزحمه وقفل الشوارع .. خاصة قدام مستشفى الجامعه وده الكمان المثالى اللى تمنع العربيات انها تعدى فيه طبعا



أشهر أبناء المحافظة ...

* الفريق عبد المنعم رياض رئيس أركان حرب القوات المسلحة المصرية في [[حرب الاستنزاف]
* الفريق سعد الشاذلى رئيس أركان حرب القوات المسلحة المصرية في حرب 1973 م.
* درية شفيق المناضلة و السياسية المصرية .
* وزير الشباب والرياضة سابقا عبدالأحد جمال الدين
* الأديب سعد ابراهيم ابوالمعارف سلامه
* المؤرخ عبد الرحمن الجبرتي
* دكتور أحمد خالد توفيق ( دكتور طب المناطق الحارة بكلية الطب ، وأشهر أدباء العصر الحالى .. مؤلف سلسلة روايات " ما وراء الطبيعة و فانتازيا و سفارى " )





* دكتور نبيل فاروق .. الرجل الذى ترك بصمه فى فكر كل شباب هذا الجيل ..
* المستشارمحمد ايمن شاكر العنانى عضو الحاشية الملكية الذى حارب من أجل المعتقلين السياسيين ولقب بمحمد البتة
* القارئ الشيخ محمود خليل الحصري
* القارئ الشيخ مصطفى إسماعيل
* الشيخ يوسف القرضاوي رئيس لجنة الفتوى
* الشيخ السيد النقشبندي
* الشيخ عبد الحى النجار
* المفتي نصر فريد واصل
* مفتي الديار المصرية سراج الدين البلقينى
* الصحفي أحمد المسلماني مقدم برنامج الطبعة الأولى
* الموسيقار عبده الحامولي
* الموسيقار محمد فوزي
* الفنانة هدى سلطان
* الفنانة عفاف راضى
* الفنانة زهرة العلا
* الفنانة مي كساب
* الفنان محمد عطية بطل الموسم الأول من ستار أكاديمي
* بطل كمال الأجسام أنور العماوي



صور من طنطا ....

محطة السكة الحديد



شارع البحر ( الجيش )





مسجد السيد البدوى




مبنى المحافظة





لا .. دى صوره من الراوند .. عادى يعنى





الخميس، 1 أكتوبر 2009

قصة شبه سخيفه

كان حماده يجلس وحيدا فى هدوء ووداعه .. عندما سمع طرقا على الباب ،،

لم يكن معتادا على زيارات فى هذا الوقت من اليوم ...

" مين اللى جى الساعه دى ؟ " هكذا حدث نفسه

- " مين ؟ "
= أنا
- أنت مين ؟
= أنا البيروقراطيه يا حماده
- هى ناقصه هزار ؟ انت مين ياعم ؟

قالها وفتح الباب .. ليجد ان هذا الـ - عم - لم يكن يهزر


لقد كانت البيروقراطيه نفسها تقف أمامه وتضحك ضحكه شريره مبرزة أسنانها الصفراء التى لم تحاول غسلها يوما ...

- الحقونى .. البيروقراطيه هتاكلنيييييييييييى

قالها حماده و انطلق يجرى بينما انطلقت البيروقراطية خلفه ...

و أخذت المسافه بينهما تضيق ... و أدرك حماده أنه سيكون الطبق الرئيسى على مائدة البيروقراطية ، فقط تمنى ألا تستخدم الكثير من البهارات

وفجأة لمح حماده باب فى نهاية الممر .. أسرع اليه و فتحه وأغلقه خلفه بسرعه واستدار ليجد الخلفيه الورديه للأمور حيث الطيور تزقزق بسعاده فى كل مكان بينما أمطار من الدمغات والأورات المختومه بخاتم شعار الجمهورية تتساقط من كل مكان و الموظفين البشوشين يبتسمون بود من حوله ..

لم يتمالك حماده نفسه من فرط السعاده .. حتما هذه هى جنة الملفات .. " فلتولع البيروقراطيه بجاز " - هكذا قال - .. " من النهارده خلاص كل ورقى هيخلص فى ساعتها .. معدتش هتعطل ولا هقف فى طوابير ، ومعدش حد هيقلى ابقى تعالى بكره يا حبيبى و ... "


كاااااااااااااااات

* وحش .. وحش يا بيروقراطيه .. الأداء مش عاجبنى ، مينفعش كده دى سابع مره نعيد المشهد .. مقرفه شغلانة المخرج دى


أما حماده فقد تأفف فى ملل وذهب هو الآخر ليستعد لاعادة اللقطه