اتكلمنا قبل كده عن خط ماجينو ... المره دى هنتكلم عن خط بارليف
السلام عليكم
فى يونيو 1967 قدرت اسرائيل تحارب مصر و سوريا والاردن وفلسطين وتهزمهم فى آن واحد ...
لك ان تتخيل مدى الاحباط اللى سببته الهزيمة دى للشعوب العربية كلها ... بسبب نكسة 1967 اصبح لاسرائيل اليد العليا عسكريا ،، قبل الحرب دى كان العرب يقدروا فعلازا ما كانوا بيقولوا فى تصريحاتهم يمحوا اسرائيل من على الخريطة ، انما بسبب القيادة غير الحكيمة المسئولة مسئولية مباشرة حصلت النكسة دى
نكسة عسكرية ومعنوية ..
اسرائيل حبت تأمن نفسها تماماا من جانب مصر فقررت بناء خط دفاعى بينها وبين مصر على طول الضفة الشرقية للقناة
وبنت اسرائيل خط بارليف
خط بارليف .. اقوى مانع صناعى بين جبهتين فى التاريخ ...
اللى كتير ميعرفوهوش ان مصر عشان تبدا المواجهه المباشرة .. وش لـ وش .. مع اسرائيل كان عليها انها تعدى اكبر مانع مائى بين جبهتين فى تاريخ الحروب ، وبعديه اكبر و احسن مانع صناعى فى التاريخ
علشان كده كانت حرب اكتوبر معجزه بكل المقاييس ...
رفع علم اسرائيل فى مكان الموقع قبل البناء
خط بارليف .. خد اسمه ده نسبة لـ " حاييم بارليف " .. يهودى نمساوى الأصل اتولد 1924 .. كان قائد سلاح المدرعات فى العدوان الثلاثى على مصر 1956 ، وتولى رئاسة الأركان فى الجيش الاسرائيلى سنة 1968 ، كان سفير اسرائيل فى روسيا فى الفترة من 1992-1994 ، وتوفى سنة 1994 فى تل أبيب
"إن المصريين لا يعرفون أي جحيم سوف ينصب عليهم بمجرد أن يضعوا أقدامهم خارج الضفة الغربية للقناة !!"" – حاييم بارليف
استخدمت اسرائيل فى بناء الخط اللى اتكلف حوالى 500 مليون دولار وقتها الأسرى المصريين اللى اسرتهم بالجمله فى حرب 67 .. كمان استخدمت قضبان الحديد المصرية اللى كانت واصله مصر بالشام .. استخدموا قضبان حديد بطول حوالى 200 كيلو فى تحصين الخط
خط بارليف
- طوله : وصل 22 متر
- انحداره : زاوية 45 درجه
- العمق : 12 كيلو داخل سيناء
كمان فى خط بارليف كان فيه خزانات لمواد قابلة للاشتعال ( النابالم ) كانت مجهزه انها تنطلق فى القناة لمواجهة اى محاولة للعبور على سطح القناة وكانت بتصل درجة حرارة اللهب 700 درجة مئوية ، وبعتت مصر ضفادع بشرية قفلوا فتحات الخزانات دى
الخبراء السوفييت قالوا ان مصر محتاجه قنبلة نووية عشان تقدر تعدى من خط بارليف
يقال ان اسرائيل مكانتش عامله خطة طوارئ لاخلاء حصون خط بارليف من فرط الغطرسه وتخيلها ان مستحيل عبوره
عامة فشل خطوط زى خط بارليف وخط ماجينو دمر نظرية خطوط الدفاع الثابته
". ولست أتجاوز إذا قلت أن التاريخ العسكري سوف يتوقف طويلاً بالفحص والدرس أمام عملية يوم السادس من أكتوبر 1973 حين تمكنت القوات المسلحة المصرية من اقتحام مانع قناة السويس الصعب، واجتياح خط بارليف المنيع وإقامة رؤوس جسور لها على الضفة الشرقية من القناة بعد أن أفقدت العدو توازنه كما قلت في ست ساعات." الرئيس السادات
هناك 10 تعليقات:
رائع جدا الموضوع ده يامحمد....
كمان ماكنتش اعرف عنه
كتير اوي
بس ده بمناسبه ايه
هو احنا في 6 اكتوبر؟؟
لا بس انا بكتب عن الحروب الفتره دى مع نفسى كده
سعيد جدا انه عجبك
وضوعك مرتب اوى و اسلوب لذيذ وصور منسقه بس معرفش رايك ايه فى اللى بيعتبروا حرب اكتوبر كانت مجرد تكمله لحرب الاستنزاف و يعنى كان الرئيس السادات زى ما بيقولوا خلاص يا تيجى ا اتنين عور و بيبرروا رايهم ان مكنش لينا خطه منظمة فى الانسحاب او اننا نكمل الحرب يعنى مجرد عرنا و خلاص و عشان كده وقفنا عن التلت الاول من سينا و مش كملنا ....... تعرف يا محمد اصعب حاجة ان يبوظ فرحك بنصرك ناس من ابناء وطنك و بجد كنت حزين جدا و انا فى لقاء فى بورسعيد و ناس مصريين بيقولوا ده لاحد قاده الحرب ايامها و كانوا مستضفينوا تتخيل لما دول يقولوا كده الناس اللى بره ممكن يقولوا ايه
موضوعك رائع بجد
تقبل مرورى
محمد الفقى
الله يرحم السادات كان راجل عبقري
موضوع تاريخي مرتب احييك عليه
السلام عليكم
شكرا يا فقى
منورنى
فعلا التثقيف عن حرب اكتوبر فيه نقص شديد جدا
وناس كتير فعلا مش عارفه عظمة الانجاز ده
لورنس
فعلا السادات كان عبقرى
الله يرحمه
بقى استخدمت الأسرى
المصريين وحديد السكة
الحديد بتاعنا كمان!!!
ياهـ عليهم لا دين ولا ملة
الصهيانة دول فعلاً.
بجد معلومات مفيدة وجديدة
كمان عليا واتمنى الهمة العالية
والروح العظيمة للشعب المصرى
ايامها ترجع تانى عن قريب يارب
هترجع ان شاء الله
شكرا يا دكتوره
حلو جدااااااا ياكيبلو ونظام رائع
تسلم ايدك ياجميل
شكرا يا خوخو
إرسال تعليق