ضربة جزاء

قصة قديمة

من مجلة TRL العدد التانى

(( تووووووووووووووووووووت ))

· ضربة جزاء ، ضربة جزاء لمنتخب مصر ياسلام ياسلام ضربة الجزاء دى فى منتهى الأهمية لإن زى مانتوا عارفين إللى هيفوز بالماتش ده هايتأهل لكاس العالم

· و شايف العندليب هو إللى داخل يشوط ، يالا يا عندليب عايزين نفرح يابنى

و جاء صوت الجماهير من خلف المعلق هاتفين:

· يارب

ووقف الناس فى الشوارع و الميادين يتابعون الشاشات العملاقة هاتفين:

· يارب

ووقف العمال فى المصانع و المهندسين فى المواقع هاتفين:

· يارب

ووقف الطلاب فى المدارس هاتفين:

· يارب

ووقف الأطباء فى المستشفيات و الفلاحين فى المزارع هاتفين:

· يارب

ووقف الناس على القهاوى هاتفين:

· يارب

كانت لحظة من الصفاء و النقاء و الإخلاص فى الدعاء من جميع فئات الشعب يدعون دعوة واحدة

وهنا عاد صوت المعلق قائلا:

· وداخل العندليب...داخل العندليب...وهوباه...هوباه.... و جوووووووووووووووووووووووووووون

و ارتفع صوت الجماهير من خلفه هاتفين :

· جووووووووووووووووون

وارتفع صوت الناس فى الشوارع و الطلاب فى المدارس و المسئولين فى المكاتب هاتفين:

· جووووووووووووووووون

و عاد صوت المعلق:

· ياسلام كده مصر تتأهل لكاس العالم عظيمه يامصر عظيمه يا مصر

· لأاااااااااااااااااااااااااااااااااااااااااه

· فيه إيه ياراجل ؟ كابوس تانى؟ قولتلك إبقى اتغطى و إنت نايم

· الحمد لله كان كابوس

· إيه شفت إيه؟

· تصورى شفت إن مصر كسبتنا و إتأهلت هى ، بس إن شاء الله إحنا إللى هنغلبهم فى ماتش بكره

· ياعم نام ، و إبقى البس بنطلون بعد كده

· طيب

(( واستدار ينام فى هدوء و سلام نفسى وهو يحتضن علم جيبوتي... بلده الحبيب ))