إمتحان الطب الطبيعى و التأهيل والروماتيزم والباثولوجيا الإكلينيكية

السلام عليكم

إمتحانين فى يومين ورا بعض الأحد 4 والإتنين 5

من أول ما بدأنا نروح العيادة الشاملة ف بداية سنة رابعة و أنا بشوف قسم الطب الطبيعى ده ومش عارف هو بتاع إيه بالظبط يعنى

وأخدنا راوند طب طبيعى وبرضه فضلت مش عارف هم عايزين إيه يعنى

و كنت واقف قدام اللجنة مستنى أدخل أمتحن الشفوى أول إمبارح حافظ الكلمتين ومش عارف برضه يعنى الناس دى إيه دورها فى الحياة

لحد ما سألت النائبة إللى بتوزع اللجان " ألا صحيح يا داكتوره .. هو إنتوا بتوع إيه ؟ بتعملوا إيه يعنى ؟ "

بس الحمد لله عرفت دلوقتى ودخلت أمتحن بقلب جامد إن لو الدكتوره جوه سألتنى " أنا ميييين " هعرف أرد عليها


الباثولوجى إمتحانه ظريف برضه

متوقعين إننا حافظين كل القيم الـ normal إللى فى الحياة

وبيستغربوا أوى أما تسألهم " إللى مكتوب ف الريبورت ده نورمال ولا لأ "

عاملين فى القسم نظام إشتغاله للطلاب عشان يخلوهم يشتروا الكتب .. إنهم بيدوا كل طالب كود يدخل بيه الإمتحان وقت ما يشترى الكتاب

الجميل ف الموضوع إن الكود ده عباره عن ترتيب مسلسل للطلبة بس بحروف و أرقام يعنى انا مثلا 11R وإللى قبلى 10R و إللى بعدى 12R و كده يعنى

الخلاصه هم عايزين الـ 25 جنيه بتوع الكتاب وخلاص

يعنى كان من الأسهل يقولوا كل طالب يجيب 25 جنيه فى ظرف ويكتب إسمه عليه ويسيبه عند السكرتيره وخلاص ، بدل ما يتعبوا نفسهم ويطبعوا كتب وبتاع


الملاحظ إن حالة الإكتئاب العام عند الكل

أو أنا بما إنى مكتئب حاسس إن الكل مكتئب ، يمكن ده إللى بيسموه Paradigm shift

مكتئب من إللى بيحصل فى غزه

مكتئب من كل حاجه حواليا

مكتئب من الإمتحان .. ده إسمه لوحد يجيب إكتئاب


أعتقد إن إللى حصل فى ماتش الأهلى و الإسماعيلى ده ، مش غضب الجمهور من الخسارة بس ، ده زى ما كان عمرو أديب بيقول كده دى تراكمات ....

ده نتيجة خناقة الراجل مع مراته الصبح وضربه لعياله قبل ما ينزلوا المدرسه و خناقة مع سواق السرفيس عشان البريزه الباقى و خناقته مع زمايله ف الشغل و قناة الجزيرة و غزة و الأسعار و البنزين و فى آخر الليلة ماتش الأهلى

مستنيين منه إيه يعنى