انتخابات نقابة الأطباء

السلام عليكم
الجمعه 13-12-2013

المشاركة الأولى فى انتخابات نقابة الأطباء....


رحت أنا والصديق أيمن تاج للنقابه وأدلينا بأصواتنا ... بس كده :)


ملاحظات ..

- النهارده كان برد فزيييييييع

- أيمن ده كويس 

- كان فيه رجال شرطه يؤمنون سير العملية الانتخابية ...

- الراجل اللى كان ف اللجنة بيطلع الأسامى طلع قريبى ..

- كان فيه دعايه انتخابية جوه النقابه عادى جدا ...

- لسه معرفش النتيجه بالتفصيل ..

وده أيمن وهو واقف مستنينى ...

خطوبة وأشياء أخرى ...

السلام عليكم ..

- ازيك يا مدونه 

=ازيك يا استاذ محمد .. عامل ايه ؟

-واحشانى

= بس بقى .. بتكسف وكده ،،





الشويه اللى فاتوا كان فيهم حاجات كتير ..


اسكتى .. مش انا خطبت .. 

الحمد لله .. ربنا رزقنى ببنت الحلال ..

معلش معرفتش اعزمك بقى .. لانها كانت ع الضيق كده و كمان اللاب كان بايظ .. يعنى مكنتيش هتعرفى تحضرى :) ..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

و فى اطار سعى الحكومه لرفع المستوى الصحى فى قرية العمدان وبتوجيهات من السيد الرئيس .. تقرر نقلى إلى الوحدة الصحية هناك لـ صرف علاج لبط ووز وأطفال القرية ..

الوحدة الصحية بالعمدان .. ودى عربية عمرو :) 

دولاب الطوارئ

شنطتى :)

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الحمد لله جاتلى النيابه فى سوهاج .. حيث بلد المواويل وكده ..

ودى مجموعه من أهم معالم سوهاج

فريق مدرسة "برديس" الابتدائية بسوهاج

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

اللاب باظ و قرر ان كفايه كده .. 

عشان تصدقينى اما قلتلك ان اللاب كان بايظ ..

عايز اشترى لاب جديد .. هتوحشنى يا صديقى العزيز ..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الاهلى من شويه فاز ببطولة افريقيا ..

عبد الظاهر رفع اشارة رابعه

العيال ف الشارع كانت عامله دوشه

و تسلم الايادى

سحر

- استيقظت سحر من نومها على صوت المنبه المزعج

اخرجت مسدسها من تحت الوساده و أخرسته باصابة مباشرة لساعته السادسه .. وعادت لتنام بهدوء ودعة ..

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

استيقظت سحر مرة أخرى على صوت رضيعها الذى يصرخ لسبب ما ..

قامت من نومتها لاعنة الأطفال الصغار والمسلسلات التركى .. اخرجت طفلها من مهده و فتحت شباك الغرفه والقته ..

وعادت لتنام وهى تحلم بنوم هادئ مريح ..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

لم تكد سحر تنم حتى جاء زوجها ليوقظها متسائلا عن اشياء كان يراها مهمة بما يكفى لايقاظها ..

كان يتحدث عن طفل سقط ف الشارع ، وصوت اطلاق رصاص .. وما الى ذلك ..

لم يكف عن الكلام الا عندما غرست السكين فى عنقه ..

ثم ذهبت لتعد لنفسها مشروبا دافئا يساعدها على ان تنعم ببعض النوم الهادئ ،،

فوزى

السلام عليكم ..


فوزى .. هدية عيد ميلادى :)

أنا بقوله يا "فوزى" .. وهو بيقولى يا "مياو" 

--------- 1 -----------

-  دينا محمد

= الإسم ثلاثى يا آنسه   

-  دينا محمد عبد السلام

= طيب اتفضلى يا آنسه الاستماره دى امليها و استنى اما نندهلك

اخذت دينا مقعدها وسط مجموعه أخرى من المتقدمين لشغل عدة وظائف مختلفة فى تلك المدرسة الألمانية التى تقدمت للعمل بها كمدرسة للغة الإنجليزية ... وبدأت فى ملأ الاستمارة ..

الإسم ثلاثى يا آنسة ... حسنا .. دينا محمد عبد السلام ، السن 25 سنه ، الحالة الاجتماعية عزباء  "أعزب" بلغة الاستمارة

= آنسة دينا محمد عبد السلام

- أيوه

= تعالى اتفضلى

- هو انا بملى الاستماره دى ليه ؟ منا باعته الكلام ده كله فى الـ CV على الـ EMAIL

= التعليمات كده نعمل ايه .. اتفضلى عشان الانترفيو

سمعت كثيرا عن البيروقراطية الألمانية وهاهى تتعرف عليها ..

جلست "دينا" فى غرفة الاتنظار حوالى عشر دقائق قبل أن تطلبها السكرتيره لتقابل مسئول الموارد البشرية ..

انهت المقابلة الشخصية سريعا عكس المتوقع .. لم تخرج بأى انطباع .. فالرجل كان محايدا تماما .. فقط قام بالتعليق على تقديرها فى الكلية فـليسانس آداب تقدير "جيد" ليس أفضل ما يمكن تحقيقه

إلا أن الإنجليزية بالنسبة لها لم تكن مجرد دراسة .. كانت تحب اللغة بحق .. وكانت بارعة جدا فيها .. تشاهد الأفلام الأمريكية بدون ترجمة منذ إعدادى .. تجيد الحديث باللهجة الامريكية والبريطانية .. معها شهادات فى اللغة من المراكز المعروفه وغير المعروفه .. كانت دائما ما تصحح النطق لزميلاتها حتى انها سبقت H  دبور بزمن فى أن الفرق بين الـ B  والـ P   زى الفرق بين الـ T و الـ S

كانت نموذج الطالبة التى تحب الدراسه .. طالما لا توجد امتحانات ..

كانت تحب مواد الترجمة  والرواية .. بينما لم تستهويها أبدا مواد الحضارة والنقد وما الى ذلك .. كان ترى ان مثل هذه المواد يجعل الكلية نظرية بطريقة لا تطاق 

ما الجدوى فى معرفة الفرق بين بحر السبوندية والترويشه .. هذه أشياء لا يعرفها أهل اللغة أنفسهم .. أنت لا تذهب للبقال فى يورك وتتلو عليه بيتا من الشعر

بينما كانت تحب مادة الترجمة فعلا .. وكانت تتمنى أن تصبح مترجمة .. لكن ترف الاختيار لم يكن متاحا ..

مشكلتها مع مهنة التدريس انها لا تحب التعامل مع الأطفال .. فالغالبية منهم مملين ، مزعجين وكثيرى الشكوى كما انهم فى احيان كثيرة وقحين ..

إلا انها كانت تحاول ان تجعل تعاملها مع تلاميذها محترفا قدر الامكان . وذلك من خلال تجربتها الوحيدة القصيرة كمدرسة فى مدرسة تجريبية ..

اذا فهى مقابلة أخرى كمثيلاتها .. عرفت ما سيحدث  ستذهب للمنزل تتناول الغذاء وتنام وتنسى أمر هذه الوظيفة كغيرها ..

هكذا فكرت بينما فى طريق عودتها .. فجأه سمعت من يقول من خلفها : " على فين يا قمر ؟ "

تعودت على سماع مثل هذه المعاكسات .. واتبعت القواعد التى طالما اتبعت .. لم تنظر خلفها .. اسرعت الخطى ..

لكن الفتى ظل يتبعها

 -  ايه العسل ده

.-  خدى بس .. دا انا هتجوزك

 - جمالك ده ولا جمال عبد الناصر ؟

.- طيب الساعه كام معاكى ؟

بدا أن الفتى مثابرا حقا .. فقد ظل مسافة لا بأس بها يسير خلفها

كانت لا تدرى ما تفعل .. أول مره تتعرض لهذا الموقف .. عادة ما يلقى أحدهم كلمه وينتهى الأمر .. أما هذا فقد تمادى فعلا..

فكرت وحسمت أمرها وفجأة دخلت الى أول محل قابلها وقالت لصاحب المحل الذى كان يجلس على مكتبه بجوار المدخل

-  لو سمحت الأخ ده ماشى ورايا من ربع ساعه بيعاكسنى

= امشى يلا من هنا بدل ما اطلعلك .. امشى 

فر "الأخ" هاربا .. بينما سألها صاحب المحل :

= انتى كويسه ؟ اجيبلك حاجه تشربيها ؟ ابعت معاكى حد يروحك ؟

-  لأ .. شكرا جدا لحضرتك 

تساءلت كيف يمكن للبعض ان يعتقد أن "المعاكسة" تسعد الفتاة  ..؟؟؟ ... إلا انها على الرغم من ذلك و لسبب لم تفهمه رفعت تلك الحادثة من معنوياتها .. الناس ليست بهذا السوء اذا وهناك من يحتفظ بقدر من الرجولة والشهامة

عادت إلى المنزل .. تناولت طعام الغذاء .. ونامت .. ونسيت أمر هذه الوظيفة كغيرها ..

حتى جاء الاتصال بعدها بيومين ..

- ماما .. قبلونى فى المدرسة الألمانى ..

رسم محمد سامى

- يتبع -  

فى بلد مرعوب

السلام عليكم

كان فيه مقال لدكتور " أحمد خالد توفيق " بعنوان " عن أدب الرعب فى بلد مرعوب " .. بيتكلم فيه عن أدب الرعب فى مصر وانه مش شايفله مستقبل هنا ..

لان اللى بيقرا أدب الرعب بيبقى عايز يعيش ف جو رعب واثارة وسسبنس ،، بينما يكفى فى مصر هنا انك تمشى ف الشارع عشان تعيش اقصى درجات الرعب والاكشن ...


امبارح .. كنت رايح القاهرة .. زى اى مواطن عادى

أوم ايه نوصل فوق كوبرى بنها ونقف ..

خير يا ولاد ؟ قالك الناس قاطعه الطريق

قلنا وماله حقهم يقطعوا الطريق .. والدستور مدى الحق لكل مواطن انه يقطع ..

نستنى ساعه .. اتنين .. ان الطريق يفتح .. أبدا

تلات ساعات .. لأ بقى.. ده كده يبقى أكيد اللى قاطع الطريق مش مواطنين بنى أدمين عاديين ..

اربع ساعات ... هنا بقى بدأت تتكاثر الاقاويل عن طبيعة قاطعى الطريق المجهولين ..

ماهو اصل ايه اللى يخلى " دولة " بأجهزتها ونظامها وحكومتها وقوتها وهيبتها مش عارفه تفتح طريق كل ده .. ومش اى طريق ده بدون مبالغة اهم طريق فى مصر كلها ؟؟!!!!


البعض قالك ان فيه كائنات فضائية نزلت احتلت مبنى المحافظه فى بنها كبداية لاحتلال شامل لكوكب الأرض ..



والبعص الآخر جاب سيرة تنانين مجنحة وديناصورات ..


المهم ..

بعد خامس ساعه .. الحمد لله قدرت اهرب .. وعدت الى أرص الوطن سالما " أحبيبتى يا كفر الشيخ "


شوية حاجات بقى ...

- ممكن اى حد تطلع ف دماغه يروح يقطع طريق - وتانى بكرر ده من وجهة نظرى أهم طريق فى مصر كلها - ،، انما انه يفضل قاطع الطريق وفق آخر معلوماتى من مراسلينا ف الطريق المقطوع ما يزيد عن 12 ساعه ده يبقى اسمه " فشل "

- أما دولة تبقى مشلولة و مش عارفها تحافظ على أمنها القومى بالطريقة دى .. ده يبقى اسمه " فشل "

أما البضايع تبقى مش عارفه تتنقل والعساكر مش عارفه توصل وحداتها واللى رايح شغل مش عارف يوصله .. واللى ف اسعاف مش عارف يروح المستشفى .. واللى مسافر الطياره فاتته ... يبقى ده اسمه " فشل "

- أما دولة بكل امكانياتها تبقى مهترئة كده يبقى ده اسمه " فشل "


دى دولة فاشلة .. بقيادة فاشلة .. بذكرياتك الزبالة يا زبالة


دولة زى دى ... تقدر تحل مشاكلها الداخلية ؟

دولة زى دى .. تقدر تدافع عن نفسها لو حد فكر يحاربها ؟


ألا صحيح لو دخلنا حرب فعلا بكره الصبح .. الوضع هيبقى عامل ازاى ..

طالما الوضع كده واحنا فى حالة "نهضة و ارادة شعب"  ، واذا حتى كان المخربين ودعاة عدم الاستقرار هم اللى ورا الكلام ده دلوقتى فاعتقد اما تيجى تحارب  ان الاعداء مش هيبقوا حريصين على دفعة عجلة الانتاج يعنى ،،،


بالمناسبه .. فيه 7 عساكر جيش وشرطة مخطوفين النهارده ف سينا ،،

ده بمناسبة " الدولة " يعنى ...



شوية تصاوير من موقع الحدث 


اتوبيسنا ..

الطريق كان مقطوع من الجهتين  ..

وعشان الناس تقدر تخرج من الزحمه دى .. فيه اللى كسروا الرصيف اللى فى نص الطريق  .. وفيه اللى بنوا مصاعد ومهابط للعربيات تعدى عليها :)

متعرفش جابوا الفاس منين .. 

وبناة الأهرام فى سالف الدهر كفونى الكلام عند التحدى  :)

وجه أول متطوع يجرب الكوبرى الجديد ..

و .. هييييييه

روحت انا الحمد لله ف عربيه من دول .. من بنها لبركة السبع .. من بركة السبع لطنطا .. من طنطا لكفر الشيخ

الدروس المستفاده ..

1- الاخوان بيخسروا كتير جدا على الارض من المواقف دى .. و انا مش شايف مبرر بصراحه للى بيحصل ده غير انهم اما غير كفء او مش ف دماغهم ..

2- الاعداء والمتربصين واللى عايزين يلخلخوا الاستقرار لو كانوا بالنجاح ده .. فده معناه ان الاخوان اما غير كفء او مش ف دماغهم ..

3- همضى على ورق حملة تمرد ان شاء الله .. عشان الاخوان مش كفء أو مش ف دماغهم ..

عن الألمانى والألمان وأحمد موسى

السلام عليكم ...

الألمانى 

لا مش الألمانى ده ..

الألمانى ده ...

من شهر ونيف امتحنت امتحان B1 بتاع الالمانى فى معهد جوته والحمد لله نجحت ..


هم صحيح ف الشهاده كاتبين انى م الغربية ..  ومبرر الست (اننا بنكتب المحافظة مش المراكز " يا عبيط ") وبما ان كفر الشيخ دى جزء من الغربية يبقى انت م الغربية ..

طبعا شرحتلها معلومة ان كفر الشيخ استقلت عن مديرية الغربية بعد ثورة 52 مباشرة واصبحت محافظة مستقلة .. بس الشهادة كانت طلعت خلاص .. واللى حصل حصل :)   





صورة تذكارية فى نهاية B1 

الراجل اللى مصور الصوره دى مدرس المانى كان عنده مجموعه بعدينا فى الـ Raum ( الأوضه يعنى بس بالانجليزى)  وطلبنا منه يصورنا صوره تذكارية بس كانت المشكلة اول ما بدأ يتكلم لانه كان بيتكلم المانى :) ... طبعا بعد كثير من الـ wie bitte ? و الشفاه المفتوحه قالى ما مفاده " انت مين اللى بيديك المانى يلا ؟ "


الألمانى بيبقى كويس طول مانت بتتكلم مع المصريين .. بيبقى المانى مصرى كده ... بس اما تتكلم مع حد المانى المانى يعنى بيقلب يبقى لغة تانيه " المانى ده يا مرسى "

الألمانى لغة مش بنت ناس ... دى معلومه لازم تعرفها ..

الألمانى لغة دماغها تعبانه .. دى معلومه أخرى

الألمانى بعد فتره هتتعود عليه .. دى آخر معلومه بهذا الشأن


الألمان شعب أنزوح .. دى ملاحظتى الشخصية عنه .. ببس اللى اقدر اقوله انهم عندهم ما يتأنزحوا بشأنه يعنى .. 


النهارده 14 مايو .. 

عيد ميلاد أحمد موسى .. وده طبعا تزامنا مع الاحتفال بقيام دولة اسرائيل ..

زميل الكلية والشارع والألمانى برضه " دى بقى فعلا آخر معلومه بجد "

كل سنه وانت طيب يا موسى واشوفك كده بشمهندس كبير قد الدنيا ،،


حاجه أخيره أحب اضيفها ..

الميل فاى ده من الحاجات الجميلة اللى ف الحياة ..

البتاعه دى هدية ليك يا موسى على فكره :)

"جون" يذهب الى السوبر ماركت

رسم الصديق محمد سامى :)

كان المزارع "جون" فى السوبر ماركت يشترى ما طلبت منه زوجته شراءه قبل عودته من العمل بالحقل ..

وعندما انتهى من شراء كل ما فى القائمة وأضاف عليه العدد الجديد من مجلة " سوبر ميكى " التى يقرأها سرا ذهب ليدفع الحساب ،،

وقف صاحب السوبر ماركت يحسب ثمن مشتروات "جون" الذى وقف ينتظر متمللا الى أن سمع صوتا غريبا بجواره ليلتفت ليجد أن الشخصين اللذان كان يقفان بجواره قد تحولا لدجاجتين ،،،

نظر "جون" لصاحب المحل فوجده قد انتهى من حساب ثمن المشتروات ، هذا بالطبع بالإضافة الى أنه قد تحول لدجاجة هو الآخر ...

تملك الرعب من "جون" وحاول أن يقول شيئا ما لكنه لم يستطع .. أما صاحب المحل فقد طالبه بثمن المشتريات قائلا : " كاك كاك كاك "

استدار جون وخرج من المحل مسرعا .. حتى أنه نسى عدد "سوبر ميكى" .. وأخذ يجرى عبر طرقات القرية ليجد أن كل من فى القرية قد تحول الى دجاج ،،،

لم يدر "جون" ماذا يفعل فتوجه لبيته مسرعا ليجد أن زوجته هى الأخرى قد تحولت الى دجاجة .. فكر أن هذا يجعل الوضع ليس بهذا السوء فتحولها لدجاجة يجعلها فى جميع الأحوال أقل ازعاجا ... أما زوجته فقد انكمشت على أحد الكراسى فى رعب وهى تشاهد برنامجا للـ "شيف أسامه" على التلفزيون ،،

خرج "جون" من بيته لا يلوى على شئ .. لا يعرف ماذا عليه أن يفعل ، وأخذ يتجول فى املدينة حتى رأى أحدهم يجلس يطالع الجريده فى فناء منزله الخلفى ،،

هتف "جون" .. "أحدهم لم يتحول مثلى " .. وانطلق "جون" يجرى فرحا باتجاه الرجل الذى لم يكد يلمح "جون" حتى هب من مكانه فزعا وصاح "أنت لم تتحول .. اذن أنت المسئول عن كل هذا أيها الوغد "

قالها و أخرج بندقيته بسرعه من تحت مقعده وأطلق النار ليصيب منتصف جبهة "جون" ...

ابتسم الرجل .. وأثنى على دقى تصويبه .. وأخرج من جيبه دفتر التصويبات وأضف علامة (صح) جديده تحت خانة "منتصف الجبهة" ،، ثم نادى:

" كله تمام ياريس .. كان فاضل واحد متحولش بس أنا قتلته خلاص .. كده القرية بقت تحت سيطرتنا "

هنا خرج (ديك كبير) من داخل المنزل مبتسما وضربا كفا بجناح .. وشربا أقداح الجعة احتفالا بالزعامة .....