تاج
جالى تاج من صديق الطفولة حسام غانم ( أعرفه من بتاع تانيه ثانوى كده )
اسم مدونتك ؟
قبلاويات
مجال دراستك ؟
خامسة طب بشري
الصورة الرمزية لمدونتك بتعبر عن ايه ؟
أحمم ...
هى طبعا بتعبر عن حاجات كتير
المشكله بس إن مفيش صورة أصلا ( وش واحد بيضحك بسماجه )
هل فكرت فى إغلاق المدونة ؟ والسبب ؟
لأ مفكرتش
ايه رد فعلك لو حد قل أدبه عليك في التعليق ؟
هو لو بيقول رأيه و الكلام مش خارج يعنى .. فأعتقد هو ده الغرض من المدونة يعنى
إنما لو قل أدبه قل أدبه ... هحذف الرد يعنى
أسوأ مدونة ؟
أعتقد هى المدونة دى
هيحصل ايه للإيميل بتاعك بعد ما تموت ؟
هو أكيد هيزعل عليا
لإن بحسن معاملته و مربيه ع الغالى
أديت الباس وورد لحد قبل كده ... ؟
لأ
السفر بالنسبة لك ؟
بحب السفر جدا جدا جدا
بس المشكلة إن فى كثير من ا
أحيان مش بعرف أسافر لظروف دراسية أو عائلية أو مادية
عامة إن شاء الله مشافر تبع الكلية لصربيا فى تبادل طلابى
المود بتاعك ؟
مودى ( مش اسم دلع ) ..
مزاجى بطريقة رهيبة
شخصية هوائية يعنى
بتعمل ايه فى وقت فراغك ؟
بضيعه بطرق محدش يقدر ينافسنى فيها
بنام
بلعب ع الكمبيوتر
نت
بقعد مبعملش اى حاجه كده لحد م اليوم يخلص
الأكلة المفضلة ؟
مكرونة طبعا بكل صورها و أشكالها
جمبرى
ملوخية
أكتر ست حاجات بتكرهها ؟
الكدب
الخيانة
ممدوح فرج
مفيد فوزى
أكتر ست حاجات بتحبها ؟
مش عارف
مش عارف بصراحه
شخصيتك نوعها ايه ؟
ملول
لحوح ( مبسوط يا حسام ؟ )
مش بكره حد
لماذا دخلت عالم التدوين ؟
يعنى وسيلة أكتب فيها أفكار و يوميات
أجمل كلمة قيلت فى وصف مدونتك ؟
مش حاجه بعينها
كل رد اتقال جميل
أهمية التعليق بالنسبه لك ؟
يعرفنى فيه حد مهتم ولا لأ
حد بيقرا ولا لأ
حد بيشاركنى ولا لأ
و أكيد طبعا بتسعدنى جدا
أحسن بوست كتبته وليه ؟ ضع اللينك
هى دى قصة
أعتقد انها نالت قدرا من الاستجسان
كنت نزلتها وقت أحداث غزة الأخيرة
http://keblawyat.blogspot.com/2009/01/blog-post_13.html
أفضل بوست قرأته ؟وأفضل مدونة؟
مش بوست واحد
و فيه مدونات كتير جميلة
وعامة أكتر مدونات عجبتنى هم اللى حاططهم فى قايمة المدونات اللى بتابعها
الإنترنت بالنسبة لك ايه ؟
وسيلة رائعة في كل مجالات الحياة
تمرر التاج لمين ؟
هو أنا كنت عايز أمرره لناس كتير بس
همرره لدول ويا رب ماكونش تقيل على حد
هناك 14 تعليقًا:
الاولىىىىىىىىىى
اخيرا يابني رجعت تكتب
هو المنتخب جابلك اكتئاب ولا ايه
هي اول مره يعني
بس ايه ده طلعت صاحب حسام
طفوله !!
هو الثانويه طفوله
الله يرحم ايام الابتدائي لما كنتوا هتموتوا وتبقوا رجاله ف ثانوي :D
وبعدين ياراجل حد يقول ان مدونته اسوأمدونه
بالعكس ع فكره
مدونتك مش وحشه ابدا
وجميله اوي والله
بس عيبها انها زمالكاويه :D
ضيعه بطرق محدش يقدر ينافسنى فيها
بنام
بلعب ع الكمبيوتر
نت
بقعد مبعملش اى حاجه كده لحد م اليوم يخلص
ماحدش يقدر ينافسك ايه بس
الناس كها كده يابيه
:D:D:p
وياااسلام ع الشر
حاططني اول واحده
انا جاوبت اصلا :p
قبل البوست الاخراني ده
كل تاج وانت طيب يازملكااااااااوي
جميل بس هم انت طنشت اول سؤال ولا ايه
ههههههههههه
طيب اعرف ان البنات هما اللى مش بيحبوا بيقولوا اساميهم
المهم اهلا بيك زميلنا فى الكلية
وطبعا تحية خاصة لانك زملكاوى طبعا معظم الدكاترة
زمالكوية
ههههههههههه
سلام
السلطانية !
قبلاوي حبيبي
برضه حاطط صورة تاج !!
تاج دي كلمة أجنبية زي ما قولتلك
المهم
إجاباتك جميلة كالعادة
معلش بتأخر فى الرد بس أنا معنديش نت الفتره دى
بس ايه ده طلعت صاحب حسام
"وبعدين ياراجل حد يقول ان مدونته اسوأمدونه
بالعكس ع فكره
مدونتك مش وحشه ابدا
وجميله اوي والله
بس عيبها انها زمالكاويه :D "
شكرا
بس دى أهم حاجه فيها إنها زملكاوية
ضيعه بطرق محدش يقدر ينافسنى فيها
"وياااسلام ع الشر
حاططني اول واحده
انا جاوبت اصلا :p "
يا خساره
منا مش متابع بقى لظروف النت
د/عرفه
هو مكنش فيه سؤال عن الإسم يا دكتور
شكرا على ردك
fat7i
بتفهم يا فتحى هو ده إللى انا أقصده
حسام
حبيبى
أنا عارف يعنى إيه tag
شوف فتحى فهم على طول أهه
اجابات جميلة يا قبلاوي
وانا اتفاجئت لما ممرتلي التاج :) شكراااااا
دي تالت مرة حد يمررلي نفس ذات التاج :)
السلام عليكم...،
اجاباتك جميلة يادكتور ومختصرة ،شخصيتك معتدلة ،
بس لية شايف مدونتك سيئة بالعكس دا أسلوبك بسيط وخفيف
وبجد مدونتك ظريفة جدا...ف انتظار المزيد...
Lady E
شكرا
ده شئ يشرفنى و عامة التالته تابته
lecaa
شكرا جدا
و شكرا مرة تانية على ردك
باشا
اجاباتك لذيذه ودمك عسل
( واخد بالك يا حسام)
ومتشكر يا باشا انك حاولت تدبسني بس للاسف ياريس
انا ادبست قبل كده وجاوبت عالتاج
يا باشا الله يخليك
ملحوقه التاجات الجايه كتير
إرسال تعليق