اتعادلنا يا رفاق

مدرب بطيخه

عمرى ما اقتنعت بحسن شحاته ده أبدا كمدرب

رغم إن كتير بيشوفوه أحسن مدرب حصل فى التاريخ و إنه تانى أحسن حاجه بعد الآله الحاسبه

لا خطه ولا شكل ولا أداء ولا أى حاجه

أنا نفسى أفهم مين إللى قاله معلومة إن محمد بركات بيلعب ف الشمال

ليه عماد متعب ؟

لعيب كسر .. ومفروض علينا .. مهاجم تعبان و الدليل وضعه الحالى فى إتحاد جده

ليه أبو تريكه وميدو و حسنى بره ؟؟؟

يعنى اللى حسنوا اللعب شويه بعد ما نزلوا هم أبو تريكه و ميدو ، وطبعا اضطر ينزلهم بعد ما ورط نفسه بالتشكيله الغريبه دى و لقى نفسه مزنوق وكان ممكن يلعب ناقص بعد ما أحمد حسن اتصاب

غير المدرب بقى ... فإحنا عندنا حبة لاعيبة زى الفل

مش هعرف أقول غير زى الفل بصراحه

أنا كنت متوقع ماتش الجزائر مع رواندا تعادل و متوقع إننا هنغلب زامبيا و كنت أتوقع إن الجزائر إللى هتتأهل فى الآخر

دلوقتى أعتقد إن تأهلنا بقى مضمون

متشوق بصراحه أشوف الزميل إللى كان بيقول هنغلب 7-0 ده بكره فى الكلية

مبروك يا ولاد

هى كانت ناقصاكوا فعلا

سلام ...

التصفيات

بكره بداية المرحلة الأخيرة فى تصفيات كأس العالم

وطبعا لازم يبقى لى دور فى الموضوع ده


هتوقع ( إشمعنى أنا يعنى )


توقعاتى خابت مع منتخب مصر فى آخر بطولتين إفريقيا وعملها و فاز بالبطولة

بس بصراحه بقالى مرتين فى تصفيات كاس العالم توقعاتى مبتخيبش

و بصراحه أتمنى تحذو حذو اخواتها بتوع افريقيا و تخيب المره دى


م الآخر توقعى الشخصى لمجموعتنا .. الترتيب كالآتى

1- الجزائر
2- مصر
3- زامبيا
4- رواندا


نفسى فعلا أشوف مصر فى كاس العالم ، نفسى أشوف أبو تريكه وهو بيرقص كريستيانو رونالدو ( صورة وش بيضحك بتهكم )


عامة مبروك للشعب الجزائرى الشقيق ...

امتحان النفسية و العصبية

السلام عليكم

الإتنين 23/3

Sorrow that isn't translated into tears makes other organs weep, every organ according to its manner

حاسس إنى بدأت أبقى ممل


كل المواضيع بقت على الكلية بس


كان عندنا النهارده امتحان نفسية و عصبية

النفسية دى جميله و لذيذه

تحس كإنك بتقرا قصة كده


بس العصبية دى اللى متعبه فعلا

الجميل ف الكلية دى انك بتحظى بالإثارة دائما

رايح الإمتحان ومش عارف هو الساعه كام

تسأل فى القسم يقولولك 12 .. و امبارح كانوا قايلين 9

المهم قرروا فجأه انهم يخلوه الساعه 10 و بدأوا الإمتحان الساعه 11

الإمتحان كان سخيف نوعا - على الأقل بالنسبه للطلبه النجباء إللى زيى -

كان فيه دكتور نفسية - دمه خفيف الحقيقة - معدى كده قبل الإمتحان ، واحد سأله " الإمتحان أخباره إيه يا دكتور ؟ "

قاله " داحنا هنطلع ........كوا "

شكرا




الحالة فى الإمتحان كان واد صغير

و الدكتور إللى بيمتحن كان كفاءه بصراحه ، كان واخد لجنتين وقدر يخليهم كلهم ميعرفوش يجاوبوا

و طبعا أنا مكنتش أفضل حالا منهم

بس مش عارف بصراحه إيه فى إجابتى إللى خلاه يضحك وهو بيقولى " طيب اتفضل امشى "

أنا طبعا اجاباتى مميزه بس مش للدرجه دى




المقولة إللى فوق دى كانت فى كتاب النفسية

مفادها متشيلش فى نفسك يعنى

وعشان كده أنا مش شايل فى نفسى حاجه أهه





أعتقد انى محتاج أقوم أنام

سلام

e-learning ... عقبال الميه و النور

الأربع 18/ 3

النهارده مكنش فيه محاضرة أطفال

كان بدالها محاضرة عاملها مركز تطوير التعليم ف الجامعة

وهم مختارين مادة من كل دفعه و عاملينلها منهجها و أسئلة و فيديوهات و أنيميشن بقى و شغل ع النت

و مختارين الأطفال من سنه خامسة

فى المحاضرة كان جى واحد من بتوع التطوير دول بيشرحلنا إزاى نستخدم الموقع ..

اللى بيشرح كان بيشرح على أساس إن مستوى الناس إللى قدامه مفيش خالص .. على أساس إن الكمبيوتر بالنسبه لهم فى تعقيد أى مركبة فضاء محترمه

و للأسف فيه نسبه كبيره كده فعلا ...


طبعا جمعونا فى مدرج التشريح ( المدرج الوحيد النضيف ف الكلية ) .. الكمبيوتر غلبهم على ما رضى يفتح ..



بس بصراحه أنا سعيد يعنى ..

أنا داخل الكليه دى و هى كليه تانيه غير إللى دلوقتى خالص

يعنى قصص الخيال العلمى إللى كنا بنسعها فى الجامعات التانيه بقينا بنشوفها أهه

فعلا الخمس سنين إللى فاتوا دول كانوا محورين فى تاريخ الكلية ...

بس يعنى بينضفوها أما قربنا نخلص

جدول حماده اليومى *

جدول أعمال حماده اليومى*

كلية الصبح

كورسات بعد الكلية

مرواح

أكل

نوم

كلية الصبح

كورسات بعد الكلية

مرواح

أكل

نوم


الفترة الأخيره دى ... كل الأيام شبه بعض

كلها نفس الوتيره

وكلها زحمه

مش لاقى وقت أعمل أى حاجه

و طبعا من الحاجات إللى مش لاقيلها وقت ( يا حرام ) المذاكره

و بما إن الإمتحانات بدرى السنه دى شهر

يبقى أعتقد من حقى إنى أصاب بالإكتئاب

ده يعنى فضلا عن الزمالك ربنا يكرمه


بالمناسبه الأهلى ده بيثبتلى فعلا وجهة نظرى إنه هو و ألمانيا بيلعبوا حلو أو بيلعبوا وحش مبيخسروش

الأهلى مع الجيش و بترول أسيوط متبهدل و يستحق يخسر و رغم كده مبيخسرش

و طبعا هيفوز بالدورى كالعاده


يوم الإتنين إللى فات كان فيه حريقه ف العماره ...

دى يعنى حبيت أختم بيها الموضوع

- أهلا بالإكتئاب
= أهلا بيك يا حماده

_____________________________________________________________

* حماده اليومى ( إسم مركب ** )

** إسم سفينه