طبيب بشرى بنظارة

السلام عليكم


امبارح 5-4 -2012 استلمت الشغل


وبما انى مش بستلم الشغل كل يوم فاعتقد ان ده يوم مهم فى حياة مصر والمصريين ..


بقيت مستوظف حكومى ...


يعنى امضا وختم و كلمات متقاطعة و فول وطعمية و بطيخه 




اول امبارح عملت الكشف الطبى فى التأمين اللى الحمد لله أثبت انى " لائق كطبيب بشرى بنظاره " .. احد الزملاء قعد يضحك اوى على طبيب بشرى بنضاره دى   مش  عارف ليه ..

وهنا حيث أعمل ...   مركز صحة الأسرة بالرياض 

حاجات كتير

السلام عليكم


ازيك يا مدونتى الحلوه ...


فيه حاجات كتيره حصلت الفتره اللى فاتت دى ...




مش انا اتخرجت ... 


ايوه مخلص الكليه من 2010 بس متخرج فى 2012 .. عادى يعنى

بالليل كان فيه حفلة لفرقة " بساطة " ..


فرقة جامده بصراحة ... بس الصوت مكانش واضح اوى

كمان عديت مستوى A1 فى معهد جوته 

الفصل بتاعنا  unsere Klasse Raum München 205

مع السلامه بقى دلوقتى .. تليفونات بقى

التنين الجميل

يحكى أنه كان هناك تنين جميل يحبه الجميع .. يطيع معلمته فى الفصل ، ولا يرافق أصدقاء السوء ويشرب اللبن ويفرش أسنانه قبل النوم ،،،

كان لهذا التنين زوجة أب شريرة .. سيئة السمعة .. تقسو عليه وتسئ معاملته ،،، بينما أبوه المسكين المغلوب على أمره لا يملك أن يحرك ساكنا أمام صلف هذه الزوجة المتجبرة القاسية ...


لم يكن خافيا على أحد ما يعانيه هذا التنين المسكين من زوجة أبيه .. إلا أنه كان تنينا صبورا حمولا ,, كان يصبر على اكفاء السجائر فى قفاه وعلى الخوازيق التى ارهقت مؤخرته المسكينة ... وكان يقول لم يحثونه على الاعتراض ورفض هذا الوضع المهين بأن زوجة أبيه وعلى الرغم من كل ما يعانيه منها ليست بهذا السوء ، فعلى الرغم من قسوتها عليه وحرمانه من الطعام و الشراب .. فضلا عن سممعتها السيئة فى المنطقة التى تجلب العار لأبيه وله .. إلا أنها أحيانا ما تحنو عليه وتقدم له الطعام دون أن تبصق فيه و كثيرا ما تترك له ما تبقى من كوب شاى ليشربه .. بالاضافة طبعا إلى أن زوجة الأب التى تعرفها خير من التى لا تعرفها ،، ولربما يأتى اليوم الذى تنصلح فيه ،،،،







كانت زوجة الأب تحاول دائما تشويه صورة التنين أمام المسكين أمام الجميع ، وكانت تصفه بأنه شاب مستهتر منفلت ولطالما حاولت اقناع أباه بأنه ابن عاق وولد فاسد ... وكان الأب ضعيف الحيلة لا يملك أن يرد عليها .. فلطالما عانى الأب نفسه من سلطها .. وكثيرا ما ناب قفاه نصيبا من سجائرها .. فكان يتحسس قفاه ويصمت ...














- " أوووه .. ياله من مسكين "  ( تعليق أحد المتابعين )














كفى .. هكذا قرر التنين يوما ، قرر أن : "كفى " .. لن يصبر أكثر على هذه المهانة ، هو ضاحب هذا البيت .. فلم اذا يلف له بالفتات ؟؟ .. لم يصفه سئ السمعة بسوء السمعة ؟!! .. فضلا عن أن مؤرته لم تعد تحتمل خوازيق أخرى ... 


وهكذا ، عندما جاء ميعاد الخازوق الصباحى أعلن التنين رفضه .. بل وعلا صوته ..
نظرت له زوجة أبيه فى دهشة وعدم تصديق ،، إلا أن أباه تضامن معه لأول مره .. وعلت الأصوات ،، حتى أن الجيران أخذوا يتساءلون عما يحدث ،، ثم فوجئوا بزوجة الأب تخرج من باب الشقة مسرعة تحمل بؤجتها ، الزوج من خلفها يعلنها بصوت عال : " طلقتها .. طلقتها "




عمت الفرحة الشارع كله .. وتبادل الجميه التهانئ ، واستطاع التنين أن يرفع رأسه فى الشارع .. بل إن أباه الذى كان يرد على اتصالات زوجته المشبوهة بنفسه استطاع أخيرا أن يجلس على المقهى دون أن يتغامز عليه الجميع ..


إلا أن غمرة الفرح هذه لم تدم طويلا .. فالبيت فى حاجة لزوجة ترعى مصالح الأب و الإبن ,,, وهكذا بدأ أولاد الحلال من أهل المنطقة فى البحث للأب عن زوجة ...


إلى أن جاء أحد شيوخ المنطقة و اقترح على الأب أن يعيد زوجته ولو لفترة بسيطة حتى يجد زوجة أخرى لأن البيت لا يمكنه أن يظل دون امرأة لفترة طويلة ...




راقت الفكرة للأب ... فبالتأكيد تعلمت الزوجة درسا قاسيا ولن تستطيع أن تعود لما كانت عليه ، كما انه سرعان ما سيتزوج من الزوجة الجديدة التى ستكون هى حينها سيدة المنزل ..




و هكذا عادت زوجة الأب مرة أخرى مكسورة ذليلة .. لقد انتهى عهد المعاملة السيئة ، و السجائر التى تجد القفا مطفأة لها .. ما عادت الأقدام لتمد ولا الأوجه لتصفع ....




كان التنين يشعر بالفخر حقا لما حققه .. خاصة وهو يرى زوجة أبيه وهى تخدمه وتخدم أباه ولا تقوى على رفع صوتها .. تلك التى كانت هى الآمرة الناهية ....




بعد فترة فتر حماس الأب فى  البحث عن زوجة جديدة ... و بدأت المكالمات الهاتفية المشبوهة تعود لزوجة الأب مرة أخرى دون علم أبيه ،،، 
حاول التنين لفت نظر الأب لما يحدث ، إلا أن أباه نهره ووصفه بأنه شاب مستهتر ومنفلت وابن عاق يتطاول على زوجة أبيه .. 


اندهش التنين من ردة فعل الأب ،، الا أن ما أدهشه فعلا  الخوازيق التى بدأ يجدها فى كل مجلس ،، والحروق المستديرة التى يجدها فى قفاه كلما استيقظ من النوم ، الا انه لم يلق بالا لهذه الحوادث كثيرا ... حتى بدأ أبوه فى التدخين و اشترى مجموعة من الخوازيق الجديدة ..




والآن بعدما أضناه البحث عن زوجة أب جديدة ، وبعدما استهلكت مؤخرته من الجلسات الصباحية المشتركة لخوازيق أبيه و زوجة أبيه .. قرر أن يتوقف عن البحث عن زوجة أب جديدة .. وأن يبدأ فى البحث عن مؤخرة جديدة ...

زيارة مفاجئة

-  ما هى خلاص الثورة قامت يا عم

= يا أخى ملعونه دى ثورة ع اللى عملوها

كنت عامل زيارة مفاجئة للتأمينات والمعاشات النهارده علشان أتفقد أحوال ورق معاش الوالد ..  بس طبعا كعادة الزيارات المفاجئة الورق بتاع المعاش كان عارف ميعاد الزياره وكان مستعد ومجهز نفسه ..

المهم بينما انا واقف فى الطابور منتظر دورى لأنال شرف مقابلة موظف الشباك وجها لوجه .. جه  أحد " المواطنين الشرفاء " وزعق مع الموظف اللى على الشباك المجاور ، و طبعا الموظف بدأ يشتم فى الثورة اللى خلت الناس تعترض على انه سايب مكانه و " معطل مصالح الناس " على حد تعبير الراجل اللى كان بيزعق

الظريف بقى .. إن كل " المواطنين الشرفاء " اللى كانوا حاضرين على اختلافهم تبادلوا سب و قذف الثورة ووصفها هى وأمها وأبوها بأوصاف " مش ظريفه " .. وإزاى إن كان زمان واحد بس اللى بيسرق بس البلد كانت ماشيه .. إنما دلوقتى البلد كلها بقت حراميه ..

قبل بداية الحوار الشيق ده جه " مواطن شريف " آخر وتخطى الدور ولف للموظف من جمب الشباك ... نفس " المواطن الشريف " ده أسهب فى وصف الناس الوحشة وأن أى حد بقى بيسرق .. أى حد ممكن ف الشارع يثبتك

-   أو أى حد مثلا ممكن ييجى يطنش الطابور ويعدى دوره .. شفت بقى المشكله  مش ف الثورة على فكرة

دى كانت مساهمتى المتواضعة فى هذا الحوار الجميل ..

بصراحة الشعب ده يستاهل سيادة الريس .. وعلى رأى فتحى* صديقى: ارجعلنا يا كبير 

عامة .. مما سبق نستنتج أن :

 مش المفروض تستغرب أوى م اللى العساكر بتوع الجيش بيعملوه ،، ما أهو أصل مثلا الواد اللى كان قدامى على طول ف الطابور أما هيخلص جامعة هيدخل جيش .. وف الغالب هيبقى ظبوط صغيور ،،، كل " مواطن شريف "  من دول مخلف " مواطنين شرفاء " عنده ف البيت ، وعلى فكره " المواطنين الشرفاء "  بيدخلوا الجيش برضه عادى ..

الناس دى هى اللى بتضرب العيال اللى بتخرب و بتضيع البلد ..

ده إذا كنا قاعدين وعندنا تليفزيون و نت وجرايد وخلافه .. والناس بالمنظر ده .. ما بالك بالعسكرى اللى قاعد فى ثكنته ومعندوش مصدر أخبار غير " محمد بيه " وأوامر " محمد بيه " و أحيانا " قناة الفراعين " ...

وعلى فكره .. نفس الناس دى برضه اللى هتضحلى بنفسها وحب الوطن والحاجات دى أما يحاربوا اسرائيل ..

ــــــــــــــــــــــــــــــــــــــــــــــــــــــــــــ

* فتحى .. من الشباب النقى الطاهر 

3/9/1939

السلام عليكم ...


دى تدوينه كتبتها ع البلوج قبل كده .. بس بما ان النهارده 3/9 كتبتها تانى :)

3/9/1939

بداية الحرب العالمية التانية ..

ده اليوم اللى أعلنت فيه فرنسا وانجلترا ومعظم دول الكومنولث الحرب على ألمانيا



بنهاية الحرب العالمية الأولى .. كانت ألمانيا شبه اتدمرت تماما ، وكان اقتصادها معدوم ووقعت عليها عقوبات مشدده جدا


على الرغم من كده بعد ما وصل هتلر للحكم فى ألمانيا .. قدر فى خلال 5 سنين بس انه يحول ألمانيا من دولة معدمه لقوه عظمى قدرت فعلا انها تتحدى العالم كله فى الحرب العالمية التانية وكانت قريبه جدا من انها تحقق انتصار كبير يخليها تسيطر على أوروبا كلها و كانت الخطوه اللى بعديها بالتأكيد العالم كله


التحول الرهيب اللى حصل لألمانيا ده كان سبب رئيسى فيه هو أدولف " هتلر " ..

شخصية كاريزمية .. خطيب مفوه .. قدر يحط نفسه فى صورة الزعيم .. قدر يخلى شعبه يحبه ويصدقه

كان متأثر جدا بأفكار دارون عن الانتخاب الطبيعى و عدم تساوى الأجناس .. وكان شايف إن الجنس الآرى هو أسمى الأجناس وانه هو اللى لازم يسود العالم




فيه لهتلر مقولة ذكرها فى كتاب " كفاحى " بيتكلم عن الزنوج
( ” لا يمكنك أن تأتي بقرد من علي الشجرة ثم تلبسه البذلة و ربطة العنق و تجعله محامياً أو طبيباً بينما المئات من أبناء الجنس الأسمي يعانون البطالة”.)


أما تولى هتلر الحكم فى ألمانيا يقال إن مرتب الألمانى وقتها مكنش يسمح بشراء 4 حبات بطاطس ، ورغم كده زى ما قلنا فى 5 سنين بس اتبنت ألمانيا تانيه ... ألمانيا جديدة .. ألمانيا قوية


مع زيادة قوة ألمانيا بدأت دول أوروبا خاصة بريطانيا وفرنسا يقلقوا م الموضوع ده .. و أما دخل هتلر النمسا فى سبتمبر 1938 بحجة إنها امتداد لألمانيا وإن هو بيرجعها للموطن الأم تغاضت الدول دى عن الاحتلال ده على أساس ميدخلوش فى مشاكل مع ألمانيا .. خاصة إن النمسا بلد صغير ومش مؤثر أوى

لكن فى مارس 1939 كمل هتلر احتلال تشيكوسلوفاكيا اللى كان جزء منها تحت سيطرة ألمانيا أصلا بحكم اتفاقية اتعملت سنة 1938 .. ده خلى الدول الأوروبية تقلق أكتر خاصة بعد ما حسوا انه بيتجه لدخول بولندا

راحت بريطانيا وفرنسا عاملين اتفاقية دفاع مشترك مع بولندا وفى نفس الوقت وقع هتلر ميثاق عدم اعتداء مع الاتحاد السوفيتى وده طبعا عشان يأمن جانبه و يفضى لمواجهة الدول اللى فى الغرب


وفى 1/9 1939 دخلت ألمانيا بولندا

وفى 3/9/1993 أعلنت فرنسا و بريطانيا الحرب على ألمانيا ودى كانت بداية الحرب العالمية التانية


وده ملخص للحرب العالمية التانية فى سطور :

• أعلنت فرنسا وانجلترا ومعظم دول الكومنولث الحرب على ألمانيا فى 3/9/1939.
• احتلت القوات الألمانية الدنمارك والنرويج وهولندا فى مايو 1940.
• استسلمت فرنسا فى 22 يونيو عقب تعرضها للهجوم من قوات العاصفة الألمانية.
• بدأت المعركة البريطانية حين حاول الألمان أجبار بريطانيا على الخضوع عبر علميات قصف جوى مكثف غير ان البريطانيون صمدو.
• غزت ألمانيا المجر وبلغاريا ويوغسلافيا فى ابريل 1941.
• غزا هتلر روسيا فى 23 يونيو 1941.
• هاجمت اليابان ميناء بيرل هاربر والفلبين والملايو فى 7 ديسمبر 1941.
• أعلنت الولايات المتحدة وغالبية حلفائها عدا روسيا الحرب على اليابان فى المقابل أعلنت ألمانيا وحفاؤها عدا فنلندا الحرب على الولايات المتحدة.
• انقلبت الأوضاع فى منطقة شمال أفريقيا عقب انتصار الحلفاء فى العلمين ثم نزول قوات أمريكية فى الجزائر.
• استسلمت ايطاليا فى سبتمبر 1943 عقب غزو الحلفاء لجزيرة صقلية بجنوب ايطاليا.
• انتصرت أمريكا فى معارك بحرية ضد اليابان فى بحر المرجان وميدواى كما استردت الفلبين فى 1945.
• انتصرت روسيا فى ستالنجراد 1943 وقامت بهجوم مضاد على طول الجبهة لطرد الألمان فوصلت جيوشها بولندا فى 1944 واستطاعت طرد قوات المحور من البلقان.
• فى أواخر 1944 تحررت فرنسا عقب أنزال قوات الحلفاء فى نورماندى غرب فرنسا وقوات أخرى فى جنوب فرنسا.
• فى 7 مايو 1945 استسلمت ألمانيا دون شرط.
• أعلنت روسيا الحرب على اليابان وغزت منشوريا.
• فى 6 أغسطس 1945 اسقطت الولايات المتحدة أول قنبلة ذرية على هيروشيما ثم تبعتها بقنبلة اخرى فى 9 أغسطس على ناجازاكى.
• أعلنت اليابان التسليم فى 14 أغسطس 1945 ووقعت شروط التسليم فى 2 سبتمبر 1945

 

فى ذكرى النكبة

السلام عليكم ،،

متأخره شويه .. يعنى كان المفروض تبقى فى ذكرى النكبة فعلا .. 

تحميل pdf

الـ E.coli

السلام عليكم

بنتكلم عن الـ E.coli ،، وده بمناسبة الـ E.coli outbreak اللى ف المانيا دلوقتى وانتشر فى دول تانيه




 

الـ E.coli من البكتيريا اللى بحبها - مش عارف ليه - بس بحس انها ظريفه كده وحبوبه ...

 


اتسمت " ايشيريشيا كولاى Escherichia coli " نسبة لطبيب الأطفال الألمانى "تيودور ايشيريش " .. فاكر انا ان كتاب الميكرو كان كله علماء ألمان ،،


 

الـ E.coli فيه منها strains سلالات كتير اكتر من 700 سلاله ، أغلب سلالاتها غير ضاره .. دى كمان مفيده لانها واحده من الـ flora اللى ف الامعاء .. يعنى بتصنع فيتامين K ، وكمان بتنافس الـ pathogens التانيه و بتتخانق معاها ع الأكل و المكان ...

فى حين ان السلالات الضاره منها ممكن تكون مميته ..
منها strain اسمه "E. coli O157:H7" بيعمل حاجه اسمها Hemolytic - uremic syndrome
بيبقى فيها hemolytic anemia و acute renal failure
بس دى بتبقى اكتر فى الاطفال عن الكبار .. ونسبة الوفاه منها 5 - 10 %

الأعراض
 
اسهال

فى الـ strain “O157:H7” بيبقى الاسهال معاه دم .. بس فى بدايته بيبقى اسهال عادى مش مصحوب بدم ، كمان ممكن يبقى فيه قئ و آلام فى البطن abdominal cramps

بتتنقل ازاى

اكل ، ميه ، منتجات الألبان ملوثه بفضلات الحيوان او الانسان عادى يعنى ، وكمان من السماد العضوى ..

وعشان كده فى فحص الأغذية والميه بتستخدم الـ E.coli كـ Indicator ، فوجودها يعنى ان الاكل ده حصله fecal contamination

احسن طرق للوقاية " FDA " :
غسل الايدين ..
الطهى الجبد ..
غسل الفاكهه و الخضار كويس ..
لبس جوانتيات للى بيتعاملوا مع الاكل زى عمال المطاعم ..
بسترة اللبن ..
لبس جوانتيات عند تغيير حفاضات طفل عنده اسهال ولو مفيش يبقى غسل الايد كويس بعدها

بيقولوا ان اكتر حاجات مرتبطة بالـ outbreaks بتاعة الـ E.coli هى الخيار والسبانخ - مش عارف ليه -
كان فيه Outbreak فى امريكا فى 2006 وكان تبع السبانخ
وبتاع 2011 ده خيار

العلاج

الـ E.coli حساسه لحاجات زى الـ Streptomycin و الـ Gentamycin ، الا ان المضادات الحيوية مش بتجيب التأثير المرجو عشان الـ Antibiotic resistance

كمان فى حالة الـ stain اللى بيعمل الـ haemolytic uremic syndrome ده فيه ابحاث بتقول ان استخدام المضادات الحيوية ممكن يزود نسبة حدوث الـ syndrome دى (Wong, Jelacic, & Tarr, 2000)


عشان كده الحالات العادية دى بتتعالج symptomatic او مش بتاخد اى علاج خالص ، خاصة ان الاعراض بتـ resolve
لوحدها فى خلال اسبوع


جدير بالذكر ان الـ outbreak اللى فى اوروبا دلوقتى مات منه حتى الآن 23 .. 22 فى المانيا و 1 فى السويد