أنا خلصت امتحانات

انا خلصت امتحانات

بس كده

الحمد لله ..خلصت باطنااااااااااااااه

الحمد لله

أنا خلصت باطنه


يااه

لا بجد فعلا يااه يعنى

cardio
chest
git
liver
haematology
endocrine
renal
neuro
psychiatery
infection
rheumatology
metabolism
dermatology
clinical pthology
radiology
physiotherapy


امبارح امتحان آخر امتحان باطنه

بإذن الله يكون الأخير فعلا


دخلت أوسكى دكتوره عبير


بعد كده حالات كارديو و جى آى تى و شيست


الدكتور بتاع الجى آى تى كان حلو

دخلت شيست لإباء الشيخ ... وطلبت منى تحقيق شخصية و قعدت تبصلى وتبص للصوره فى الكارنيه كده .. طبعا أنا احلويت من أيام سنه أولى فشكلى مختلف عن الصورة

كارديو أكتر حاله يعنى الراجل هزر معايا فيها

بس الحمد لله خلاص الباطنه خلصت

احساس مختلف برضه يا أخى


مش قادر أتخيل لحد دلوقتى ان لسه الأطفال ......



صورة عاملها الزميل محمد سامى لكتب الباطنه

السلام عليكم


امبارح قلت أدخل ع النت زى أى مواطن عادى فاضى معندوش امتحانات ولا حاجه


المهم ملقيتش نت


قلت يمكن الكابل بقى اتقطع ولا حاجه


نزلت الشارع وقعدت أتتبع الكابل

لحد ما لاقيت السويتش مسروق من على عمود النور


لأ ... بس حرامى ابن ناس يعنى

الراجل مقربش للكابل و لا للوصلات ولا السلوك ، سايب كل حاجه سليمه زى ماهى هو ببساطه فك السويتش منهم وخده ومشى




يا سلام لو كل الحراميه يبقوا ذوق كده .. أكيد كوكب الأرض هيبقى مكان أفضل

البرازيل و أسمنت أسيوط

قبل الماتش بيوم

جت على بالى الحته اللى فيلم " ليلة سقوط بغداد " بتاعة البرازيل و أسمنت أسيوط دى

ربنا يستر بكره

متخيل محمد أبو جريشه وهو بيشوط الكوره ويقع كعادته

أو كاكا وهو بيستلم الكوره وسيد معوض يقوم واقع بره الملعب خالص

ممكن خطة حسن شحاته تعتمد على إن لاعيبة البرازيل يقعدوا يضحكوا على لاعيبتنا و مايخدوش بالهم م الكوره نقوم احنا ناخدها منهم بقى


آخر ماتش لينا فى البطوله دى كان مع السعوديه وكنا خسرانين 5-1

والماتش الللى بعديه لاعبت البرازيل فى دور الـ 4 وخسرت 8-2


دى نغزه تاريخية بس كده

بنحبك يا سيادة المدير

قصة قصيرة كنت مشارك بيها فى العدد الرابع من مجلة TRL

= المدير اتغير يا أستاذ حسين

- يا خبر .. يادوب ألحق أجهز اليافطه

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

( عاش البيه المدير )

- ألف مبروك يا فندم

* أمال إيه اليافطه إللى بره دى يا أستاذ حسين

- الناس بتحب حضرتك جدا يا فندم

= المدير اتغير يا أستاذ حسين

- هجهز اليافطة حالا

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

( عاش البيه المدير )

- ألف مبروك يا فندم

* الله يبارك فيك .. عايزين شغل جامد يا أستاذ حسين ، صحيح .. إيه اليافطه إللى بره دى ؟

- أصل الناس بتحب حضرتك جدا يا فندم

= المدير اتغير يا أستاذ حسين

- أنا عامل حسابى متخافش

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

( عاش البيه المدير )

- ألف مبروك يا فندم

* شكرا ، أنا أسمع إنك موظف كفء

- أتمنى أكزن عند حسن ظنك يا فندم

* هى إيه اليافطه إللى بره دى ؟

- يا فندم ... الناس بتحب حضرتك جدا

= المدير اتغير يا أستاذ حسين

- هووف .. ألو .. أطلبلى الخطاط يابنى

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

( عاش البيه المدير )

- ألف مبروك يا فندم

* شكرا يا أستاذ حسين ، إيه موضوع اليافطه إللى بره دى ؟

- دى للترحيب بيك يا فندم ، أنا و الموظفين سهرانين طول الليل بنجهز فيها

* طيب وليه كده ؟

- الناس بتحب حضرتك جدا يا فندم

= ألف مبروك يا حسين بيه .. حضرتك أكفأ واحد لمنصب المدير

- هههه ..أمال إيه اليافطه إللى بره دى يا أستاذ على

= الناس بتحب حضرتك جدا يا فندم

ما هو أصل هى ناقصه

يعنى سايب امتحاناتى

و متعطل

و جى اتفرج على الماتش بقى ....


مش ناقصه ..

مش ناقصه بجد

يعنى الواحد مكتئب لوحده من غير حاجه

مش كفايه الامتحانات

يلا..

بالمناسبه حسن شحاته مش حلو

ومكنش واخد معاه بدلاء

كل سنه و انتوا طيبين


مبروك للعشب الجزائرى الشقيق

نت وا متحانات و أشياء أخرى

مفيش نت + فيه امتحانات = عزله عن العالم الخارجى

أخيرا رجع النت

اختراع ظريف على فكره النت ده


عندى امتحان أطفال يوم الأربع

- أهلا بالنت
= أهلا بيك يا حبيبى