امتحان النفسية و العصبية

السلام عليكم

الإتنين 23/3

Sorrow that isn't translated into tears makes other organs weep, every organ according to its manner

حاسس إنى بدأت أبقى ممل


كل المواضيع بقت على الكلية بس


كان عندنا النهارده امتحان نفسية و عصبية

النفسية دى جميله و لذيذه

تحس كإنك بتقرا قصة كده


بس العصبية دى اللى متعبه فعلا

الجميل ف الكلية دى انك بتحظى بالإثارة دائما

رايح الإمتحان ومش عارف هو الساعه كام

تسأل فى القسم يقولولك 12 .. و امبارح كانوا قايلين 9

المهم قرروا فجأه انهم يخلوه الساعه 10 و بدأوا الإمتحان الساعه 11

الإمتحان كان سخيف نوعا - على الأقل بالنسبه للطلبه النجباء إللى زيى -

كان فيه دكتور نفسية - دمه خفيف الحقيقة - معدى كده قبل الإمتحان ، واحد سأله " الإمتحان أخباره إيه يا دكتور ؟ "

قاله " داحنا هنطلع ........كوا "

شكرا




الحالة فى الإمتحان كان واد صغير

و الدكتور إللى بيمتحن كان كفاءه بصراحه ، كان واخد لجنتين وقدر يخليهم كلهم ميعرفوش يجاوبوا

و طبعا أنا مكنتش أفضل حالا منهم

بس مش عارف بصراحه إيه فى إجابتى إللى خلاه يضحك وهو بيقولى " طيب اتفضل امشى "

أنا طبعا اجاباتى مميزه بس مش للدرجه دى




المقولة إللى فوق دى كانت فى كتاب النفسية

مفادها متشيلش فى نفسك يعنى

وعشان كده أنا مش شايل فى نفسى حاجه أهه





أعتقد انى محتاج أقوم أنام

سلام

e-learning ... عقبال الميه و النور

الأربع 18/ 3

النهارده مكنش فيه محاضرة أطفال

كان بدالها محاضرة عاملها مركز تطوير التعليم ف الجامعة

وهم مختارين مادة من كل دفعه و عاملينلها منهجها و أسئلة و فيديوهات و أنيميشن بقى و شغل ع النت

و مختارين الأطفال من سنه خامسة

فى المحاضرة كان جى واحد من بتوع التطوير دول بيشرحلنا إزاى نستخدم الموقع ..

اللى بيشرح كان بيشرح على أساس إن مستوى الناس إللى قدامه مفيش خالص .. على أساس إن الكمبيوتر بالنسبه لهم فى تعقيد أى مركبة فضاء محترمه

و للأسف فيه نسبه كبيره كده فعلا ...


طبعا جمعونا فى مدرج التشريح ( المدرج الوحيد النضيف ف الكلية ) .. الكمبيوتر غلبهم على ما رضى يفتح ..



بس بصراحه أنا سعيد يعنى ..

أنا داخل الكليه دى و هى كليه تانيه غير إللى دلوقتى خالص

يعنى قصص الخيال العلمى إللى كنا بنسعها فى الجامعات التانيه بقينا بنشوفها أهه

فعلا الخمس سنين إللى فاتوا دول كانوا محورين فى تاريخ الكلية ...

بس يعنى بينضفوها أما قربنا نخلص

جدول حماده اليومى *

جدول أعمال حماده اليومى*

كلية الصبح

كورسات بعد الكلية

مرواح

أكل

نوم

كلية الصبح

كورسات بعد الكلية

مرواح

أكل

نوم


الفترة الأخيره دى ... كل الأيام شبه بعض

كلها نفس الوتيره

وكلها زحمه

مش لاقى وقت أعمل أى حاجه

و طبعا من الحاجات إللى مش لاقيلها وقت ( يا حرام ) المذاكره

و بما إن الإمتحانات بدرى السنه دى شهر

يبقى أعتقد من حقى إنى أصاب بالإكتئاب

ده يعنى فضلا عن الزمالك ربنا يكرمه


بالمناسبه الأهلى ده بيثبتلى فعلا وجهة نظرى إنه هو و ألمانيا بيلعبوا حلو أو بيلعبوا وحش مبيخسروش

الأهلى مع الجيش و بترول أسيوط متبهدل و يستحق يخسر و رغم كده مبيخسرش

و طبعا هيفوز بالدورى كالعاده


يوم الإتنين إللى فات كان فيه حريقه ف العماره ...

دى يعنى حبيت أختم بيها الموضوع

- أهلا بالإكتئاب
= أهلا بيك يا حماده

_____________________________________________________________

* حماده اليومى ( إسم مركب ** )

** إسم سفينه

امتحان الباطنة العامة

الأربعاء 25/2

إمتحان الباطنة العامة

بعد 100 يوم باطنة عامة

إمتحان ظريف وابن ناس

بس كالعاده طبعا مش عارفين عليه كام درجة

أنا مش عارف الكلية دى بتعاملنا كدا ليه

مش من حقنا نعرف توزيعة درجاتنا ولا درجاتنا ذات نفسها ( الكلية الوحيده إللى بتكتب التقدير وخلاص ) ده حتى ميعاد الإمتحان كتير بيخلوه مفاجأه - من باب الدعابه يعنى - إنها حقا كليه مرحه

عندنا امتحان نفسية و عصبية

يعنى نقلة كده من مادة الذبحة الصدرية و قرحة المعدة و الفشل الكلوى لمادة الإكتئاب و الشلل الرباعى

ربنا يحمينا ...

الإمتحان مش عارفينه إمتى .. وممكن أروح بكره أفاجأ إن الإمتحان بكره - عادى يعنى .. مش هتفرق كتير -

مش عارف مين إللى بيكتب الحاجات دى

إمتحان الـ MCQ بقى فجأة MSQ

و استمرارا لسياسة ( هتشترى الكتب غصب عنك يا حماده ) .. لازم و حضرتك جى تمتحن تجيب معاك الـ Log book و ده بيسلموهولك مع الكتب

يعنى عشان تعرف تمتحن ف الكلية لازم تشترى كتب القسم

لا و إيه ( حضور الـ Log book ) مش إحضاره .. ده غير إن الشخص إللى كاتب .. كاتب Loog book يعنى حتى كاتبها حتى غلط

أعتقد رئيس القسم كان بيقول أكدوا عليهم الـ Log book ييجى .. فبقت بالتالى - حضور الـ Log book -

7

"Every seven years, you are a whole new one"

أنت شخص مختلف تماما كل سبع سنين

بيقولوا - مش متأكد بصراحه - إن كل 7 سنين بتكون كل خلايا الجسم إتجددت ، بمعنى إن بيكون بقى عندك كبد جديد و كلى جديد و هكذا ...

فيه عالم أنثروبوصوفيا اسمه رودلف شتاينر قال إن ما سماه " Cycles of seven " ميقتصرش بس على تجديد الخلايا ، و إنما كمان تجديد شخصية .. تجديد اهتمامات .. تجديد فكر

النهارده كنت بدور فى حاجاتى القديمة ...

صحيح أنا عندى امتحان بعد يومين والكلام ده مش وقته خالص .. بس أنا مش هذا الطالب النجيب يعنى

و أنا بدور لاقيت حاجات كتير ....

جزء من جدول أعمال يوم من أيام و أنا ف ابتدائى

مسودة قصة .. واضح م الخط و الإسلوب إننا لسه ف ابتدائى برضه

حبة تصميمات ... شريط قديم ... حبة جوابات مع أصدقاء قدام ... يااااه


افتكرت محمد قديم .. محمد مقابلتوش من زمان

محمد بجد واحشنى

محمد مفتقده دلوقتى .. ونفسى ألاقيه


أنا الحمد لله ربنا كارمنى جدا فى حياتى .. ومعانتش ضغوط كتير

بس مش عارف حاسس إن السبع سنين إللى قبل كده كنت راضى عن نفسى أكتر ... كنت أقرب لربنا أكتر .. كنت أقرب للى حواليا أكتر

و إللى قبلهم أكتر منهم .....

إللى قبلهم مش فاكرهم للأسف ...



نفسى أعرف أتصالح مع نفسى .... و أعرف أتمتع بالخلايا الجديدة

الصيدلية مغلقة

" الصيدلية مغلقة اعتراضا على سوء تعامل مصلحة الضرائب ضد الشعب المصرى "

كل الصيدليات قافله النهارده

و معلقين ورقة كاتبين عليها الكلام ده

القصة كلها إن فى 2005 كان فيه اتفاقية محاسبة ضريبية بين الضرايب و الصيادلة وكان نظامه إن الضرايب بتحاسب الصيادلة من المنبع بمعنى إنه بيحاسب الصيدلى على أساس فواتير شرائه للأدوية ...

لحد ما يوم 9/2/2009 طلعت الضرايب قرار تانى بعد ما اكتشفت فجاة إن الوضع الحالى وحش و مش جميل وقررت إنها هتلزم الصيدلى بإنه يبقى معاه وثائق توضح المبالغ إللى اشترى بيها وإللى باع بيها ... يمكن ده هيخلى كل صيدلية تعين محاسب عندها بس مش دى المشكلة

المشكلة إن الضرايب عايزه تطبق القانون بأثر رجعى .. يعنى من 2005 ، يعنى بتطالب الصيادلة إن يبقى عندهم ما يثبت إللى اتدفع و إللى اتكسب فى الـ 3 سنين إللى فاتت

ولإن محدش من الصيادلة هيقدر يوفر الحاجات دى - لإن ببساطه الضرايب نفسها مكانتش بتطالبهم بكده - فكتير منهم هيبقى من وجهة نظر الضرايب ( متهرب ) و طبعا ما يتبع كده من حبس وخلافه ....

يمكن على الرغم من إنى محتاج أجيب دوا النهارده .... إلا إنى بجد مبسوط بيهم

لإنهم إيجابيين

لإن فكر إنك تعترض بقى موجود

فكر إنك تطالب بحقك

فكر غير إللى اتربينا عليه

بس هل الإضراب و الاعتصام حلو ولا وحش؟

يعنى زى ما بقول أهه أنا محتاج دوا و مش عارف أجيب .. و يمكن أنا أفضل حالا من ناس كتير يمكن محتاجه الدوا أكتر منى

النهارده مثلا فى يوم واحد فيه اضراب للصيادلة و اضراب لسواقين مقطورات النقل الثقيل لإن صدر قانون بمنعها سنة 2011

طيب هل الإضرابات و الإعتصامات بتجيب من النتايج الإيجابية ما يعادل سلبياتها ؟

هل يا ترى ممكن فى يوم يحصل إضراب فى المستشفيات ؟

هل هو تغيير فكر فعلا ولا مجرد حدث عابر ؟

لو فيه حاجه مهمه زى دى و انت ممكن تتأثر بيها ، ممكن عشان تعدلها تشارك فى إضراب زى ده ولا هتخاف ؟

ولا هتبقى شايف إنه مش هيجيب نتيجه ؟

رحلة معرض الكتاب

رحلة معرض الكتاب

الجمعة 30 يناير

كانت رحلة لذيذة

يمكن رغم شوية المشاكل بتاعة كل رحلة ، إنما الحمد لله عدت على خير

التجمع كان المفروض 7 الصبح .. بس الأتوبيس اتأخر بتاع ساعه كده ، زى ما فهمت السواق كان لسه جى من سفاجا ومطبق يعنى ، بس هو بصراحه كان سواق محترم جدا و متعاون



من الحاجات إللى سعدت بيها زيارة الأهرامات ، لإن يعنى عيب شاب عنده 22 سنه أهه ومرحش الأهرامات غير مره واحده ، الأخوة الأجانب يقولوا عليا إيه لا مؤاخذه .. صحيح الأهرامات كانت مرهقه بس أنا كنت مبسوط

مسابقات موسى ف الأتوبيس ملهاش حل .. المسابقة خلصت تعادل 8 - 8 ، وكانت مسابقة مفيده وعرفت فيها إن الصحراء الغربية مستقلتش سنة 2004

معرض الكتاب ... محتاج وقت وفلوس ، وف الرحلة مكنش متوفر لا وقت ولا فلوس

كنا محتارين قبل الرحلة مش عارفين المعرض يوم الجمعة بيفتح م الصبح ولا بعد الصلا ، وواحد صديق قعد يؤكد إنه الجمعه بيفتح عادى 10 الصبح ، و إن ناس سأولا ف المعرض و أكدوا كد

و ع الباب تلاقى يافطة كده

ماعلينا

سور الأزبكية ده م الإختراعات المفيدة ف الحياة .. جبت كام كتاب حلو

جبت كتب لمحمد هشام عبيه ومضالى ف الكتاب و لدكتور تامر أحمد و لعمر طاهر

فاروق جويده كان المفروض عنده توقيع ف دار الشروق و استنيناه ومجاش .. يعنى ف المرتين إللى رحت فيهم معرض الكتاب كان بيصادف يومها فيه توقيع لفاروق جويده و ميجيش ...

السندباد ... طبعا العيال إللى معانا إللى قلبهم ضعيف قعدوا يلعبوا الألعاب الهبله إللى زى السجاده و الحاجات السهله دى ،، إنما الوحوش بقى حاسب يعنى .. عربيات و زحاليق لأ و سيميولاتور كمان

الغربال دى برضه ظريفه ، بس حد يفكرنى مقعدش جمب فتحى تانى ...

نزهة نيلية ظريفه ...

بس وروحنا بقى ...

كل رحلة و إنتوا طيبين يا ولاد ...